Kina planifikon të emetojë obligacione speciale sovrane me vlerë rreth 2 trilionë yuan-ë (më shumë se 28o miliardë dollarë) këtë vit si pjesë e një stimuli të ri fiskal.

Kështu raporton agjencia “Reuters”, duke cituar dy burime me njohuri për këtë çështje.

Autoritetet kineze pritet të shtojnë po ashtu një sërë masash për të luftuar presionet e forta deflacioniste dhe rënien e rritjes ekonomike.

Si pjesë e paketës, Ministria e Financave (MOF) planifikon të emetojë 1 trilion yuan-ë borxh të veçantë sovran.

Kjo, kryesisht për të stimuluar konsumin mes shqetësimeve në rritje për një rimëkëmbje ekonomike të belbëzuar pas COVID-it.

Një pjesë e të ardhurave të MOF-së të mbledhura nëpërmjet obligacioneve speciale, të cilat qarkullohen për një qëllim të caktuar, do të përdoren për të rritur subvencionet për tregtimin dhe rinovimin e mallrave të konsumit si dhe për përmirësimin e pajisjeve të biznesit në shkallë të gjerë, thanë të dy burimet.

Të ardhurat do të përdoren gjithashtu për të siguruar një pagesë mujore prej rreth 800 yuan-ë, ose 114 dollarë, për fëmijë për të gjitha familjet me dy ose më shumë fëmijë, duke përjashtuar fëmijën e parë.

Kina synon të mbledhë 1 trilion yuan-ë të tjerë nëpërmjet një emetimi të veçantë të borxhit sovran dhe planifikon të përdorë të ardhurat për të ndihmuar qeveritë lokale të trajtojnë problemet e tyre të borxhit, shtoi burimi.

Shumica e stimulit fiskal të Kinës ende shkon në investime, por kthimet po pakësohen dhe shpenzimet i kanë ngarkuar qeveritë lokale me një borxh prej 13 trilionë dollarësh.

Shpenzimet e familjeve kineze janë më pak se 40 për qind e PBB-së, rreth 20 pikë përqindje nën mesataren globale.

Disa nga masat e mbështetjes fiskale mund të zbulohen brenda kësaj jave, thanë burimet, të cilët nuk pranuan të përmendeshin pasi nuk ishin të autorizuar të flisnin me media.