Çerimagiç: BE-ja është përgjegjëse për pasigurinë në rajon – dhuna në veri është prelud i apetiteve territoriale të Serbisë

Adnan Çerimagiç, analist për Ballkanin Perëndimor nga Inciativa Evropiane për Stabilitet (ESI), në një intervistë për agjencinë katolike të lajmeve (KNA) të martën, konsideroi se një pjesë të barrës për pasigurinë në rajon duhet ta mbajë edhe Bashkimi Evropian (BE) që “dështoi në ofrimin e një perspektivë të besueshme” për integrimin e rajonit në bllok.

Duke qenë se premtimi për anëtarësimin e gjashtë vendeve të rajonit në familjen e kombeve evropiane siguroi më shumë se dy dekada paqe në Ballkanin Perëndimor, ai konsideroi se dobësia e BE-së për momentin qëndron se qytetarët dhe politikanët në këtë rajon të rrethuar nga armiqësitë etnike, tani e kanë humbur besimin në perspektivën evropiane.

“Por ndërkohë, ky rajon është tronditur dhe minuar nga premtimet e dekadave për një perspektivë të BE-së dhe një të ardhme të ndritur që nuk realizohet kurrë”, theksoi ai, duke pasur parasysh se peisazhi politik në rajon dominohet kryesisht nga një përzierje e politikës autoritare, ndikimit rus, krimit të organizuar dhe mosmarrëveshjeve territoriale.

Ky zhgënjim, nga ana tjetër, forcon ata politikanë që “nuk hoqën dorë kurrë” nga idetë luftënxistëse të viteve ’80. Për shembull, presidenti i Serbisë, Aleksandar Vuçiç, refuzon të heq dorë nga minimi i fqinjëve, ndërsa udhëheqësi ultra-nacionalist i serbëve të Bosnje-Hercegovinës, Millorad Dodik, vazhdon të udhëheq një politikë të rrezikshme secesioniste.

“Rikthimi i dhunës në veri të Kosovës që pamë vitin e kaluar është vetëm një prelud i asaj që ata planifikojnë dhe shpresojnë. Rusia dhe aktorë të ngjashëm e përdorin këtë situatë për axhendën e tyre”, kujtoi analisti boshnjak, derisa përmendi përplasjet e fundit midis Kosovës dhe Serbisë, posaçërisht pas sulmit terrorist të paramilitarëve serbë në veri të Kosovës.

Shumë vëzhgues deklarojnë se perspektiva e rrëshqitjes drejt skajeve të krizës nuk mund të izolohet; derisa krijohen kushte të favorshme për lojtarët lokalë serbë të lidhur me interesat ruse që të zgjerojnë hijen kërcënuese dhe të provokojnë konflikte rajonale nën mbështetjen e heshtur të Rusisë, rreziku i përshkallëzimit të dhunës tani rri i varur mbi mbarë Ballkanin Perëndimor.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.