Censusi në Maqedoninë e Veriut nxjerr shqiptarë vetëm 29.5% të popullsisë

Në Maqedoninë e Veriut janë publikuar rezultatet e regjistrimit të popullsisë të realizuara në vitin 2021, ku sipas tyre del të jetë se 29.5 për qind e qytetarëve të Maqedonisë janë shqiptarë, ku 24.3 për qind e tyre janë banorë rezident.

Drejtori i Entit Shtetëror të Statistikave (EShS), Apostoll Simonovski ka thënë se “Popullsia e regjistruar është 2 milion e 97 mijë e 319 qytetarë. Popullsi rezidente janë 1 milion e 836 mijë e 713 qytetarë, ndërsa 206 mijë e 606 janë jorezidentë”.

Nga 2 milion e 97 mijë e 319 qytetarë të regjistruar në Maqedoninë e Veriut, i bie se shqiptarë janë afërsisht 620 mijë, kurse 54.21 për qind janë deklaruar maqedonas, 3.98 për qind turq, 2.36 romë, 1.18 serbë, 0.87 boshnjakë dhe 0.44 vllehë, thuhet ndër të tjera në paraqitjen e raportit të EShS-së mbi regjistrimin e popullsisë.

Kur bëhet fjalë për banorët rezidentë, 58.44 për qind janë maqedonas, 24.3 për qind shqiptarë, 3.86 për qind turq, 2.53 për qind romë, 1.3 për qind serbë, 0.87 për qind boshnjakë dhe 0.47 për qind vllehë.

Lideri i partisë më të madhe shqiptare në Maqedoninë e Veriut, Bashkimit Demokratik për Integrim (BDI), Ali Ahmeti, ka përgëzuar për punën e bërë të EShS-së dhe atyre që kanë ndihmuar në regjistrimin si proces.

“Republika e Maqedonisë së Veriut pas 20 viteve ka një pasqyrë më të qartë sa i përket numrit të përgjithshëm të popullsisë dhe përqindjes së komuniteteve në vend”.

“Përgëzoj të gjitha institucionet që ishin të përfshira dhe ndihmuan Regjistrimin si proces që filloi në muajin Mars të vitit të kaluar me diasporën e vendit e që përfundoi në Shtator me regjistrimin e popullatës në vend, proces dhe sfidë aspak e lehtë por që ia dolëm ta përfundojmë me sukses”, ka shkruar lideri i BDI-së në rrjetin social Facebook.

“Shqiptarët janë 29.5% në popullsinë e përgjithshme dhe 24.3% në popullsinë rezidente, ndërsa në qytetin e Shkupit 22.8% (nga 20.04% në 2002)”.

Pas përfundimit të regjistrimit të popullsisë më 30 shtator të vitit të kaluar, EShS kishte publikuar në faqen e saj zyrtare se janë regjistruar gjithsej 1 milion e 832 mijë e 696 persona, se janë regjistruar 568 mijë e 175 amvisëri dhe 837 mijë e 255 banesa.

Ndërsa, jashtë shtetit sipas EShS, janë 204 mijë e 805 persona që janë vetëregjistruar.

Regjistrimi i vitit 2021 është kryer nën protokolle të rrepta shëndetësore dhe në kushte të pandemisë Covid-19, sipas një metodologjie të re të EUROSTAT-it, ku për herë të parë është kombinuar një model – përveç mbledhjes së të dhënave direkt nga popullata në terren, të dhëna nga p.sh. thirrur databaza e pararegjistrimit, ku me futjen e numrit të identitetit të qytetarit në aplikacionin e regjistrimit, tërhiqeshin automatikisht të gjitha të dhënat që ekzistojnë për atë person në bazat e të dhënave në vend.

Në vitin 2002 është mbajtur regjistrimi i fundit në Maqedoninë e Veriut. Nga ai regjistrim kishte dalë se popullsia e përgjithshme ishte 2 milion e 22 mijë e 547 persona. Gjithashtu, sipas rezultateve kishte 564 mijë e 296 familje dhe 698 mijë e 143 banesa.

Sipas përkatësisë etnike thuhej se maqedonas ishin 1 milion e 297 mijë e 981 ose 64.17%, shqiptarë 509 mijë e 83 ose 25.17%, turq 77 mijë e 959 ose (3.85%), romë 53 mijë e 879 ose 2.66%, serbë 35 mijë e 939 ose1.78 %.

Pas Luftës së Dytë Botërore në Maqedoninë e Veriut janë bërë gjithsej nëntë regjistrime, 1948, 1953, 1961, 1971, 1981, 1991, 1994 dhe 2002 dhe ky i vitit 2021.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.