Céline Dion: Kam marrë 90 mg valium në ditë, nuk e dija se mund të më vriste

Varësia ndaj valiumit, spazmat e dhunshme që i thyen brinjët, ngërçet në fyt teksa këndon.

Jeta e Céline Dion është shndërruar në një makth që kur zbuloi se kishte “sindromën e personit të ngurtë”, një çrregullim neurologjik i rrallë që shkakton ngurtësi progresive të muskujve.

Një superyll i muzikës – 220 milionë disqe të shitura në të gjithë botën, një pasuri prej 480 milionë dollarësh, pesë Grammy të fituara – Céline Dion ka vendosur të tregojë dramën e saj në një intervistë me NBC.

Këngëtarja, e lindur në Kanada 56 vjet më parë, ka zbuluar se para diagnozës ajo kishte marrë diazepam për të relaksuar “të gjithë trupin” dhe për të qenë në gjendje të performojë në skenë.

“Nuk e dija, sinqerisht, se mund të më vriste. E merrja, për shembull, para një shfaqjeje, 20 miligramë valium, dhe më pas, vetëm duke ecur nga dhoma e zhveshjes në prapaskenë, efekti ishte zhdukur”.

Kështu nisi të rriste dozën “deri në 90 miligramë në ditë, një sasi që mund të të vrasë” dhe nga e cila iu desh të detoksifikohej.

Simptomat e sëmundjes janë shkatërruese.

Kur të kap fytin është “sikur dikush po të mbyt. Por mund të ndodhë edhe në zonën e barkut, në shtyllën kurrizore, në brinjë, në duar: janë ngërçe, por sikur janë në një pozicion që nuk mund t’i zhbllokoni”.

“Në një moment të caktuar kam thyer disa brinjë sepse spazmat, kur janë shumë të forta, mund të çojnë në një frakturë. Nëse gatuaj – sepse më pëlqen të gatuaj – gishtat dhe duart e mia mbërthehen në atë pozicion”.

Nuk ka kurë për këtë gjendje progresive (e cila prek 1 në një milion njerëz), por trajtimi mund të ndihmojë në kontrollin e simptomave.

Këngëtarja e vuante prej vitesh, por ajo e nënvlerësoi situatën.

“Nuk e dija se çfarë po ndodhte. Duhet të kisha ndaluar, të kisha marrë kohë për ta kuptuar”.

Përkoi me periudhën në të cilën bashkëshorti i saj i ndjerë, René Angélil, po luftonte me kancerin në fyt.

“Më duhej të fshihesha. Më duhej të përpiqesha të bëhesha një heroinë”.

Ajo u ndal vetëm në dhjetor 2022, kur njoftoi shkëputjen e saj të detyruar nga skena pasi u diagnostikua me sëmundjen.

“Në fillim pyeta veten: pse mua? Si ndodhi? Çfarë kam bërë? Është faji im? Jeta nuk të jep përgjigje”.

Pasi bëri një paraqitje surprizë në fillim të këtij viti në çmimet Grammy, kur ajo i dha Taylor Swift çmimin për albumin e vitit, Céline Dion tani është gjithashtu protagoniste e dokumentarit të drejtuar nga Irene Taylor, ku ofron një pamje të papërpunuar prapa skenave të luftës kundër sëmundjes që i ndryshoi jetën.

“Po punoj shumë çdo ditë, por duhet ta pranoj se është e vështirë”, ka treguar ajo me lot në sy në trailerin e publikuar në këto orë.

“Më mungojnë shumë performancat live, më mungojnë njerëzit”.

Megjithatë, ajo është e vendosur të rimarrë skenën, koncertet live.

“Do të kthehem. Nëse nuk mund të vrapoj më, do të eci, nëse nuk mund të eci më, do të zvarritem, do të zvarritem. Por unë nuk do të ndalem. Nuk do të ndalem kurrë”.

Marrë nga “Corriere della Sera”, përshtatur për “Albanian Post”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.