Çelet zyrtarisht qarkullimi në “Rrugën e Arbërit”

“Ditën e Çlirimit”, më 29 Nëntor – siç ishte premtuar nga qeveria shqiptare – është çelur zyrtarisht qarkullimi në “Rrugën e Arbërit”.

Në ceremoninë e hapjes së kësaj rruge të pranishëm ishin kryeministri i Shqipërisë, Edi Rama, ministrja e Infrastrukturës dhe Energjisë, Belinda Balluku, i Drejtësisë, Ulsi Manja, dhe drejtori i Përgjithshëm i Autoritetit Rrugor Shqiptar, Ervis Berberi.

Mes këngëve dhe valleve në formën e kantierit – 80% e kalueshme – tashmë “ëndrra 100-vjeçare e dibranëve” u bë realitet.

Të shtunën – vetëm dy ditë përpara inaugurimit – Balluku inspektoi nga afër përfundimin e punimeve të “Rrugës së Arbërit”.

Festat Kombëtare të 28-29 Nëntorit të këtij viti e gjetën vendin tonë përballë hapjes së dy projekteve të mëdha nga qeveria “Rama 3”.

“Rruga e Arbërit” është zyrtarisht e kalueshme dhe pjesa e mbetur e punimeve përfundon në qershor të vitit 2022.

Ndërsa, një ditë më parë, më 28 Nëntor, “Dita e Flamurit dhe Pavarësisë”, e gjeti qytetin e Vlorës me hapjen e kantierit për ndërtimin e portës së tretë hyrëse nga qielli.

Projekti i “Rrugës së Arbërit”

“Rruga e Arbërit” do të lidhë Tiranën me Dibrën me një gjatësi prej rreth 75 kilometra.

Që prej fillimit të zbatimit të saj është cilësuar si një vepër shumë komplekse dhe e rëndësishme.

Ky projekt përbëhet nga gjashtë tunele. Deri më tani kanë përfunduar punimet për pesë prej tyre.

Kontraktorit të ndërtimit të rrugës – kompania “Gjoka” – i është dashur të hapë fillimisht tunelin tre dhe katër, që pastaj të ngriheshin themelet e saj.

Një nga akset më të vështira, Qafa e Murrizit do të lidhet me Bypass-in e Klosit prej 8.8 km.

Ministrja më herët u ka bërë apel drejtuesve të mjeteve që të tregojnë kujdes në këtë segment, i cili nuk ka përfunduar ende punimet.

“Kur të ketë reshje dëbore, do të mbyllet rruga – maksimumi pesë ditë në vit -dhe do të përdoret rruga e vjetër”, ka bërë me dije më herët Balluku.

Në këtë aks ndodhet edhe ura më e lartë në Shqipëri (157 m) dhe një nga më të lartat në rajon.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.