![](https://albanianpost.com/wp-content/uploads/2024/05/Untitled-132.png)
Sekretari i Jashtëm britanik, David Cameron, do të vizitojë Shqipërinë më 22 maj.
Kështu të paktën kanë bërë me dije mediat britanike, të cilat thonë se Cameron do të njoftojë një goditje të re ndaj grupeve të organizuara kriminale që qëndrojnë pas rrjeteve të kontrabandës.
Gjatë udhëtimit të tij, Cameron do të zhvillojë bisedime të nivelit të lartë me presidentin Bajram Begaj, kryeministrin Edi Rama dhe ministrin e Jashtëm, Igli Hasani.
Sipas “The Sun” Cameron do të njoftojë një program të ri – mes dy qeverive – për të luftuar korrupsionin dhe krimin e organizuar në Shqipëri.
Ndërkaq vetëm disa ditë më parë kryeministri britanik bisedoi me homologun shqiptar.
Lajmi u bë me dije nga zyra e kryeministrit britanik.
Sipas njoftimit dy liderët diskutuan për marrëdhëniet e ngushta mes Britanisë së Madhe dhe Shqipërisë, duke vënë në dukje bashkëpunimin e rëndësishëm dypalësh, duke përfshirë tregtinë dhe investimet.
Sunak vuri në dukje progresin e fortë të bërë nëpërmjet partneritetit MB-Shqipëri për migracionin.
Të dy udhëheqësit pranuan më shumë punë për t’u bërë për të trajtuar sfidën e migracionit të paligjshëm në Evropë dhe mezi prisnin ta diskutonin më tej këtë në takimin e Komunitetit Politik Evropian në MB në korrik.
Më tej thuhet se Rama dhe Sunak nënvizuan rëndësinë e sigurimit të stabilitetit në Ballkanin Perëndimor, veçanërisht në Bosnje dhe Hercegovinë e Kosovë.
Duke iu kthyer situatës në Lindjen e Mesme, udhëheqësit diskutuan rëndësinë e trajtimit të rritjes së antisemitizmit në të gjithë globin dhe mbrojtjen e vlerave tona të përbashkëta të tolerancës dhe respektit.
Vlen të theksohet se lidhjet tregtare u dyfishuan vitin e kaluar dhe turistët e Britanisë së Madhe drejt Shqipërisë u rritën me 30% në janar 2024 krahasuar me janarin 2023, duke i hapur rrugën parashikimeve të turizmit në nivel rekord këtë vit.
Sa i takon emigrantëve Britani nënshkroi një “komunikim të përbashkët historik” me Shqipërinë në dhjetor 2022 për të përshpejtuar largimin e shtetasve shqiptarë që thotë se ndodhen në Mbretërinë e Bashkuar ilegalisht në vendin e tyre.
Rishi Sunak ka vlerësuar marrëveshjen e deportimit me Shqipërinë sipas së cilës mijëra janë kthyer në vendin e tyre të origjinës.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com