Caktohet trupi gjykues ndaj Bahtijarit, Januzit dhe Shalës

Të enjten, është caktuar trupi gjykues në çështjen ndaj Ismet Bahtijarit, Haxhi Shalës dhe Sabit Januzit pas kalimit të lëndës tek trupi gjykues më 4 shtator.

Kryetarja e Dhomave të Specializuara të Kosovës (DhSK), Ekaterine Trendafilova, ka thënë se ky rast u është ndarë gjyqtarëve, Roland Dekkers, Mappie Veldt-Foglia, Judge Gilbert Bitti dhe gjyqtarit rezervë Vladimir Mikula.

Më 28 gusht, kërkesa e mbrojtjes së ish-komandantit të Ushtrisë Çlirimtare të Kosovës, Haxhi Shalës, për ta veçuar çështjen e tij nga ajo e Ismet Bahtijarit dhe Sabit Januzit është hedhur poshtë nga gjyqtarja e procedurës paraprake Marjorie Masselot.

Sipas aktakuzës, komandant “Topi” së bashku me Sabit Januzin dhe Ismet Bahtijarin kanë organizuar takime me një dëshmitar në përpjekje për të ndikuar që ai të tërhiqet nga dëshmia.

“Dëshmitari 1 tha se nëse Shala dhe tjerët sjellin 200 mijë euro, atëherë do të kenë marrëveshje”, thuhet në aktakuzë.

Po ashtu aktakuza përfshin edhe kontakte të shumta telefonike dhe takime personale që kanë ndodhur në periudhën midis 5 dhe 9 prillit 2023.

Sipas aktakuzës, veprimet e Shalës dhe bashkëpunëtorëve të tij kanë pasuar qëllime “kërcënuese” dhe “shantazhuese” ndaj dëshmitarit, duke synuar, siç pretendojnë nga Specialja, të pengojnë drejtësinë dhe të ndikojnë në dëshminë e tij.

Shala i njohur ndryshe si komandant “Topi”, të hënën e 11 dhjetorit ishte intervistuar në zyrat e EULEX-it, ndërsa të martën u transferua në Dhomat e Specializuara të Kosovës (DhSK) në Hagë të Holandës.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.