Byrnes vazhdon dëshminë në Speciale

Ish-shefi i misionit vëzhgues diplomatik nga Shtetet e Bashkuara të Amerikës në Kosovë (SHBA), Shaun Byrnes, të mërkurën, do të vazhdojë dëshminë e tij në Dhomat e Specializuara të Kosovës në Hagë.

Kështu të paktën ka bërë të ditur zëdhënësi i Zyrës së Prokurorit të Specializuar (ZPS), Christopher Bennett, në një përgjigje për Albanian Post.

“Ju lutemi vini re se dëshmia e Shaun Byrnes do të vazhdojë gjatë sesionit të parë të seancës së nesërme. Pas kësaj seancat do të mbyllen”, tha ai për Albanian Post.

Byrnes filloi dëshminë e tij javën e kaluar.

Byrnes, javën e kaluar deklaroi se nuk ka parë kurrë prova që Shtabi i Përgjithshëm i UÇK-së ka urdhëruar kryerjen e ndonjë krimi, siç pretendon ZPS-ja.

Ky deklarim i tij u komentua gjerësisht si një çmontim i pretendimeve të Speciales së Shtabi i Përgjithshëm ka qenë i përfshirë në ndonjë krim.

Byrnes gjithashtu deklaroi në një moment gjatë dëshmisë së tij se Albin Kurti, Veton Surroi apo Blerim Shala, njëri prej tyre, i kishte thënë në kohën e luftës së UÇK-ja është një grup fshatarësh rebelë që janë ngritur kundër Lidhjes Demokratike të Kosovës.

Ata, tregon Byrns, i kishin folur për ndasitë që ekzistojnë në mes të shqiptarëve të Prishtinës dhe shqiptarëve të Drenicës, kur i kishin folur për UÇK-në.

“Njëri prej tyre (Kurti, Surroi, Shala) më tha, në një pikë dhe kjo është diçka që nuk do të harroj kurrë, e kam ngulitur në mendje që ‘UÇK-ja përfaqësonte një njësi ose grup rebelësh fshatarësh kundër LDK-së. Dhe, të tjerët janë përfaqësues urbanë qytetarë dhe të sofistikuar që përfaqësoheshin nga presidenti Rugova”, tregon Byrns.

Avokati e pyet amerikanin se “Kush e ka thënë këtë gjë?”.

Por, ai nuk kujtohej saktësisht.

“Nuk më kujtohet personi konkret kush e ka thënë këtë gjë, megjithatë e ka thënë njëri prej këtyre intelektualëve të rinj me të cilët ne bisedonim dhe i njohëm në qytet”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.