“Buxhet më shumë, e barna më pak është shqetësuese”, thotë Zemaj

Deputeti i Lidhjes Demokratike të Kosovës (LDK), Armend Zemaj, ka thënë se është shqetësuese se edhe pse ka rritje të buxhetit në shëndetësi, ka më pak barna.

Zemaj, në fjalimin e tij në seancën e Kuvendit të Kosovës, jashtë rendit të ditës ka kërkuar sqarim se përse është duke ndodhur kjo.

“Mungesa e barnave, nuk po themi mungesës vetëm të buxhetit”.

“Të gjithë i jemi gëzuar rritjes së buxhetit për barna por është shqetësuese se tash ka barna më pak. Pse po ndodhë kjo? Qytetarët e pacientët duhet ta dinë kush janë hartuesit e listës esenciale, kush janë personat kush i kontrollon ata e kush qëndron prapa tyre”, ka thënë Zemaj.

Ndërsa, ka shtuar se këtë çështje do ta adresojnë në rrugët institucionale dhe nuk do të lejojnë që ajo të fshihet.

“Është duke na dëgjuar edhe ministria edhe Prokuroria, por përgjegjësisë nuk do t’i ikni”.

Javën e kaluar në Kuvendin e Kosovës, deputetët kishin diskutuar për situatën e shëndetësisë.

Në seancën e kaluar, Zemaj ishte shprehur se për tri vjet në shëndetësinë e Kosovës s’ka pasur asnjë përmirësim, madje vetëm sa e kanë dërguar prapa edhe përmirësimin që ishte bërë në të kaluarën.

“Tre vjetori i ardhjes në pushtet të kësaj partie politike e gjen shëndetësinë tmerrësisht keq, më keq se asnjëherë më parë. Kjo qeveri me saktësisht shëndetësia në krye me ministrin Arben Vitia, u treguan të paaftë, të paditur dhe dështues. Nuk është dëshirë kjo është fakt i keq”, kishte deklaruar ai.

Opozita, kishte kritikuar pushtetin edhe për largimin e mjekëve fenomen ky në Kosovë që kishte nisur që nga viti 2016, më 2 shkurt, ministri i Shëndetësisë, Arben Vitia, kishte shprehur frikën se ikja e mjekëve do të vazhdojë edhe këtë vit.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.