Busti i Skënderbeut, së shpejti edhe në Budapest

Kryeministri i Shqipërisë, Edi Rama, së bashku me kryetarin e Bashkisë Tiranë, Erion Veliaj, ishin të pranishëm në një vizitë në kryeqytetin hungarez, Budapest.

Nga aty, ata bënë me dije se në mes të parkut qendror të kryeqytetit të Hungarisë do të vendoset busti i Heroit Kombëtar të shqiptarëve, Gjergj Kastriot Skënderbeu.

“Ceremonia e inaugurimit do të mbahet më 5 korrik”, tha Veliaj.

Rama, nga ana tjetër, tregoi disa detaje mbi vendosjen e bustit dhe bëri të ditur mbajtjen e ngjyrës kuqezi të tapetit poshtë tij.

Busti është punuar nga skulptori Agim Rada, dhe do të vendoset në Hungari, në shenjë nderimi dhe kujtimi për miqësinë e bashkëpunimin që Gjergj Kastrioti ka pasur me Janos Huniadin, heroin hungarez.

Në prill  të 2016-ës u vendos në mes të kryeqytetit shqiptar, përballë Sahatit të Tiranës, një pllakë përkujtimore për nder të heroit hungarez, Huniadi. Tanimë duket se është radha e hungarezëve që të vendosin përballë statujës së Huniadit statujën e heroit, Gjergj Kastrioti Skënderbeu.

Monumenti apo busti i Skënderbeut është vendosur në disa kryeqytete e qytete të botës dhe disa sheshe e rrugë mbajnë emrin e tij.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.