BSH e përkushtuar për kalimin në ekonomi me emetim neto zero, thotë Sejko

Gent Sejko, guvernatori i Bankës së Shqipërisë, ka thënë se ndryshimet klimatike që përbëjnë një kërcënim serioz për mirëqenien e njerëzve dhe për shëndetin e planetit, ndikojnë edhe në ekonominë e vendit.

Në konferencën “Financa e Gjelbër në Evropën Juglindore”, ai ka thënë se Banka e Shqipërisë është e përkushtuar për të kuptuar dhe trajtuar pasojat ekonomike dhe financiare të ndryshimeve klimatike dhe kalimin në një ekonomi me emetim neto zero.

Sipas tij, për vitet 2022-2024 është vendosur të monitorohen rreziqet klimatike ndaj mjedisit ekonomik dhe financiar ku operon banka.

“Ndryshimet klimatike po sfidojnë ekonominë tonë në të gjitha nivelet duke prekur të gjithë aktorët ekonomikë në të gjithë territorin e vendit”, ka thënë ai.

Sejko ka vijuar duke thënë se kjo sfidë kërkon një përgjigje të përbashkët nga të gjithë aktorët e ekonomisë, duke përfshirë edhe Bankën e Shqipërisë.

Kjo e fundit, sipas tij, ështëe përkushtuar për të kuptuar dhe trajtuar pasojat ekonomike dhe financiare të ndryshimeve klimatike dhe kalimin në një ekonomi me emetim neto zero.

“Ndarja e njohurive, praktikat, diskutimet, trajnimi i stafit dhe edukimi i publikut janë të rëndësishme në këtë proces dhe BSH do të vazhdojë t’i dedikojë burime të mjaftueshme studimit të efekteve të klimës në stabilitetin financiar”, ka shtuar ai.

Ai ka treguar se për vitet 2022-2024 është vendosur të monitorohen rreziqet klimatike ndaj mjedisit ekonomik dhe financiar ku operon Banka e Shqipërisë.

Po ashtu ai ka vlerësuar rëndësinë e diskutimit, bashkëpunimit dhe mbështetjes në nivel ndërkombëtar për të adresuar sfidat që paraqesin ndryshimet klimatike dhe tranzicioni drejt një ekonomie të qëndrueshme.

“Ne kemi zhvilluar partneritete të shumta kombëtare, rajonale dhe ndërkombëtare, për të vlerësuar dhe menaxhuar ndikimin ekonomik dhe financiar të ndryshimeve klimatike”, ka thënë ai.

Sejko ka vlerësuar sakaq bashkëpunimin me CEF-in, anëtarësimin në NGFS (Netëork for Greening the Financial System) që nga viti 2020, si dhe bashkëpunimet e ndryshme me Sekretariatin Shtetëror për Çështjet Ekonomike të Qeverisë Zvicerane (SECO), Iniciativën e Vjenës, Bankën Botërore (FinSAC) dhe të tjerë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.