Britania tërheq një pjesë të stafit diplomatik nga ambasada në Ukrainë

Media britanike “BBC” dhe agjencia “Reuters” kanë raportuar se autoritetet britanike kanë filluar tërheqjen e një pjese të stafit diplomatik nga ambasada në Ukrainë.

Zyrtarët e Ministrisë së Jashtme britanike thanë se aktualisht nuk kishte kërcënime specifike për diplomatët.

Gjysma e stafit në Kiev thuhet se është planifikuar të kthehet në Mbretërinë e Bashkuar.

Ambasada amerikane në Ukrainë kërkoi më herët evakuimin e të gjithë stafit jothelbësor.

Kjo, mes frikës në rritje të një pushtimi të afërt rus.

Ndërkaq, përfaqësuesi i Lartë për Politikën e Jashtme të Bashkimit Evropian, Josep Borrell, reagoi menjëherë pas tërheqjes së familjeve të diplomatëve amerikanë në Ukrainë, duke garantuar se BE-ja “nuk po ndjek SHBA-të”.

“BE-ja nuk po ndjek Shtetet e Bashkuara në tërheqjen e familjeve të diplomatëve të saj nga Ukraina”, theksoi kryediplomati evropian.

Sipas Borrell, nuk ka nevojë të “dramatizohet” situata ndërsa vazhdojnë bisedimet me Rusinë.

Departamenti Amerikan i Shtetit urdhëroi largimin e të gjithë anëtarëve të familjes së personelit që shërben pranë ambasadës amerikane në Kiev.

Njoftimi zyrtar i autoriteteve amerikane erdhi të dielën e 23 janarit, duke përmendur si shkak “kërcënimin e aksionit ushtarak rus”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.