Britania e Madhe, SHBA-të, Kanadaja: Rusia po përpiqet të ndërhyjë në zgjedhjet e Moldavisë

Britania e Madhe, SHBA-të dhe Kanadaja kanë akuzuar Rusinë për një komplot për të ndërhyrë në zgjedhjet presidenciale të Moldavisë dhe referendumin për anëtarësimin në BE më vonë këtë vit.

Në një deklaratë të përbashkët të lëshuar në ditën e parë të samitit të G7-ës në Itali, të tre qeveritë akuzuan aktorët rusë për “përhapje të gënjeshtrave dhe përpjekje për të minuar institucionet demokratike moldave” në një fushatë të ndërhyrjes politike të shtrirë në vite.

Të tre vendet kanë thënë se Moska po përpiqej të minonte presidenten pro-perëndimore të Moldavisë, Maia Sandu, përpara zgjedhjeve të ardhshme presidenciale dhe referendumit për anëtarësimin në BE.

Të dyja votimet duhet të zhvillohen më 20 tetor.

Ish-shteti sovjetik, i cili kufizohet me Ukrainën, ka kohë që i frikësohet ndërhyrjes ruse në punët e tij të brendshme, veçanërisht në republikën separatiste të Transnistrisë aleate me Kremlinin dhe rajonin autonom jugor të Gagauzisë.

Qeveria e Sandu ka qenë një mbështetëse e fortë e Ukrainës në luftën e saj kundër Moskës.

Qeveritë e Mbretërisë së Bashkuar, SHBA-ve dhe Kanadasë kanë thënë se aktorët rusë po kërkonin të “ngjallnin perceptime negative publike” për Sandu, qeveritë perëndimore dhe perspektivën e anëtarësimit të Moldavisë në BE.

Sandu është presidente që nga viti 2020, kur u zgjodh me 57.7% të votave në balotazhin përfundimtar.

Ata sakaq kanë akuzuar Rusinë se “përdor në mënyrë aktive dezinformimin dhe propagandën në internet, në ajër dhe në rrugët e tyre për të çuar përpara objektivat e tyre për degradimin e besimit të publikut në aftësinë e Moldavisë për të siguruar veten dhe për të ruajtur sundimin e ligjit”.

Deklarata veçoi transmetuesin shtetëror rus RT, i cili ka thënë se ishte “i përfshirë në ofrimin e mbështetjes së drejtpërdrejtë” për Ilan Shor, një biznesmen pro-rus i arratisur, i cili është dënuar në mungesë me 15 vjet burg.

Të tre vendet kanë thënë se nëse Sandu do të rizgjidhej, “ka arsye për të besuar se Moska do të punojë për të nxitur protesta”.

Ata kanë thënë se po punonin ngushtë me qeverinë moldave dhe kishin sanksionuar tashmë aktorët e përfshirë, me sanksione të mëtejshme që po konsideroheshin.

“Ne do të vazhdojmë të mbështesim Moldavinë dhe popullin moldav teksa ata menaxhojnë ndërhyrjen e Kremlinit dhe ndikimet e luftës brutale të Rusisë kundër Ukrainës”, thuhet në deklaratën e MB-së, SHBA-ve dhe Kanadasë.

“Ne mbështesim fuqimisht reformat demokratike, ekonomike, të sigurisë dhe antikorrupsion të Moldavisë dhe thellimin e integrimit evropian”, vijon deklarata e përbashkët e tyre.

“Duke zbuluar komplotin e Kremlinit, ne po ia bëjmë të qartë Moskës se ne qëndrojmë për zgjedhje të lira dhe të ndershme dhe nuk do të tolerojmë përpjekjet e saj për të ndërhyrë dhe minuar proceset demokratike. Ne i bëjmë thirrje Kremlinit të heqë dorë nga këto përpjekje për të përmbysur demokracinë e Moldavisë dhe të respektojë sovranitetin e saj dhe rezultatet e zgjedhjeve të lira, të drejta dhe të pavarura”.

Marrë nga “The Guardian”, përshtatur për “Albanian Post”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.