Shqipëria

“Bregdeti Ynë”, 30 ditët vendimtare për pastrimin e plazheve


Operacioni “Bregdeti Ynë”, për të fshirë nga harta e vijës bregdetare çdo ndërtim pa leje, u njoftua nga kryeministri i Shqipërisë, Edi Rama, në krye të këtij muaji.

Nga Shëngjini, më 1 qershor 2021, së bashku me ministrin e Brendshëm, Bledi Çuçi, ai bëri me dije se ky operacion do të jetë në bashkëpunim me Policinë e Shtetit dhe Inspektoratin Kombëtar të Mbrojtjes së Territorit (IKMT).

Një javë pas lajmërimit, operacioni “Bregdeti Ynë” nisi në Velipojë, me një shtrirje deri në Ksamil.

Në një prononcim për Albanian Post, zëvendës-kryeinspektori i IKMT-së, Guri Seferi, shpjegon se aksioni i nisur do të përfundojë më 30 qershor.

Por kjo nuk do ta ndalojë prishjen e ndërtimeve pa leje.

“Pas kësaj date”, thotë Guri për AP-në, “aksionet për evidentimin dhe prishjen e ndërtimeve pa leje do të vazhdojnë edhe në zonat e tjera të territorit të Shqipërisë”.

Ai bën me dije se “deri më tani, shembjet kanë përfunduar në Velipojë, Shëngjin dhe Kepin e Rodonit”.

Sipas tij, IKMT ka shembur 64 objekte pa leje në Velipojë, Shëngjin, Durrës dhe Ksamil.

Ndër të tjera, Guri thotë se janë prishur 254 objekte me struktura ndërtimi, druri, hekuri dhe beton.

Nga ana tjetër, Ministria e Brendshme (MB) bën me dije se “vlera e gjobave të vendosura, deri më tani, ndaj subjekteve ka arritur deri në 94 milionë lekë”. “Ndërsa”, thonë nga MB, “janë proceduar penalisht 29 persona”.

Zëvendës-kryeinspektori jep detaje se, konkretisht, në Ksamil janë prishur 22 objekte, në Sarandë tetë objekte, në Kepin e Rodonit 13, Shëngjin 10 dhe Velipojë 11 objekte.

Gjithashtu, ai shton se, veçantia e këtyre aksioneve ka qenë mospasja e kundërshtimeve nga ana e qytetarëve.

“E para, qytetarët janë të ndërgjegjshëm për ndërtimin e tyre të paligjshëm dhe, e dyta, nuk ka selektivitet në punën tonë, ku të gjithë janë të barabartë para ligjit”, tha ai.

Por, sipas Gurit, me rëndësi është përqendrimi i këtij operacioni pas qershorit.

Aksioni do të shtrihet në fshatrat turistikë, në akset nacionale, në zonat e mbrojtura, si dhe ndërtimet buzë liqeneve dhe lumenjve.

Ky operacion ka qenë një koordinim mes disa ministrive, asaj të Brendshme, të Drejtësisë dhe Turizmit.

/Albanianpost.com

Lajmet kryesore