Përfaqësuesi i Lartë për Politikën e Jashtme dhe të Sigurisë në Bashkimin Evropian, Josep Borell, pas takimit me ministrin e jashtëm serb, Marko Gjuriç, ka thënë se zbatimi i angazhimeve të dialogut janë të domosdoshme për integrimin e Serbisë në Bashkimin Evropian.

Përmes një shkrimi në platformën ‘X’ ai e ka vlerësuar këtë takim “si të mirë” dhe “konstruktiv”.

“Përafrimi me politikën e përbashkët të jashtme dhe të sigurisë të BE-së dhe zbatimi i angazhimeve të dialogut janë kyçe për integrimin e Serbisë në BE. E falënderova Serbinë për kontributin e saj të çmuar në misionet dhe operacionet tona CSDP”, ka shkruar Borell.

Gjuriç, gjatë takimit me përfaqësuesin e lartë të Bashkimit Evropian për Punë të Jashtme dhe Siguri, Josep Borell, ka pretenduar se siguria e serbëve në Kosovë është duke u cenuar.

Good & constructive meeting with Foreign Minister @markodjuric.
Alignment w/ the EU common foreign & security policy and implementation of Dialogue commitments are key for Serbia's EU integration.
I thanked Serbia for its valuable contributions to our CSDP missions & operations. pic.twitter.com/ujnYKMqGZp

— Josep Borrell Fontelles (@JosepBorrellF) June 21, 2024

Përmes një komunikate të lëshuar nga MPJ e Serbisë, është thënë se ata janë plotësisht të përkushtuar për dialogun.

“Serbët po vuajnë presion të padurueshëm si rezultat i kulmimit të veprimeve afatgjata dhe sistematike të njëanshme të autoriteteve në Kosovë”.

“Në këtë moment është e nevojshme, para së gjithash, të sigurohet siguria e popullatës serbe dhe pa vonesa të mëtejshme të zbatohen të gjitha detyrimet nga marrëveshjet e arritura deri më tani”, ka thënë Gjuriç.

Sipas tij, situata në Kosovë “është jashtëzakonisht e vështirë”.

Më 11 qershor, kryeministri Albin Kurti, deklaroi se s’ka probleme me serbët lokalë që popullojnë pjesën veriore, por me Serbinë që s’u distancua asnjëherë nga trashëgimia e fashizmit të ish-udhëheqësit të Serbisë, Sllobodan Millosheviç, i cili vdiq në burg derisa gjykohej për krime lufte, por edhe nga presidenti rus, Vladimir Putin, i cili vazhdon terrorin në Ukrainë.

Kreu i ekzekutivit kosovar theksoi se Kosova u ofroi të drejta serbëve lokalë, duke ua mundësuar integrimin e plotë në shoqërinë kosovare.

Ai kujtoi se 10 nga 38 komuna në Kosovë janë me shumicë serbe.

Në pjesën veriore të Kosovës, komunat e banuara me serbë etnikë, janë përpjekur ndër vite të mbajnë një sistem paralel të përkrahur dhe financuar nga Serbia.

Serbët në veri të territorit të Kosovës, nën udhëheqjen e qeverisë së Serbisë dhe strukturave paralele serbe në Kosovë, kundërshtojnë autoritetin e Qeverisë së Kosovës, madje në mënyrë të dhunshme.