Borrell: Kurti s’ka qenë i gatshëm për kompromis, kërkonte njohje de-facto para Asociacionit

Përfaqësuesi i Lartë i Bashkimit Evropian (BE) për Politikë të Jashtme dhe të Sigurisë, Josep Borrell, në një konferencë për media pas takimit të nivelit të lartë ndërmjet Kosovës dhe Serbisë, ka thënë se kryeministri kosovar, Albin Kurti, nuk e ka pranuar propozimin e BE-së për sekuencimin e Marrëveshjes Bazë të dakorduar në kuadër të dialogut Prishtinë-Beograd nën ndërmjetësimin e BE-së.

Kryediplomati evropian ka thënë se kryeministri Kurti ka insistuar që fillimisht të formalizohet njohja de-facto nga Serbia, ndërsa tek pastaj të vazhdohet drejt implementimit të Asociacionit të Komunave me shumicë serbe të paraparë në kuadër të marrëveshjes për normalizimin e marrëdhënieve ndërmjet Kosovës dhe Serbisë të arritur fillimisht në fund të shkurtit në Bruksel, pastaj në mes të marsit në Ohër.

“Fatkeqësisht, pas një takimi të gjatë, kryeministri Kurti nuk ka qenë i gatshëm që të ecë përpara me fillimin e një procesi të besueshëm për themelimin e Asociacionit [të Komunave me shumicë serbe në Kosovë]. Në vend të kësaj, ai ka insistuar që hapi i parë të jetë formalizimi i njohjes de facto”, ka njoftuar Borrelli pas përfundimit të takimit trelateral.

“Ne kemi propozuar të zbatohen këto paralelisht, të sigurohet që të marrë diçka e të japë diçka. BE-ja dhe komuniteti i gjerë ndërkombëtar, përfshirë partnerët amerikanë, e shohin këtë si rrugë të vetme për të funksionuar zbatimi”, ka thënë shefi i diplomacisë evropiane të enjten nga salla e konferencave në Bruksel.

Sa i përket rrugës së ndjekur nga Qeveria e Kosovës që nëpërmjet peticioneve për largimin e katër kryetarëve shqiptarë nga pozita në pjesën veriore të Kosovës e t’u hapet rrugë zgjedhjeve atje, ai ka thënë se mënyra më e shpejtë dhe efikase për mbajtjen e zgjedhjeve të jashtëzakonshme është dorëheqja e katër kryetarëve shqiptarë.

“BE-ja e sheh dorëheqjen e kryetarëve që janë zgjedhur me vetëm 3 për qind rrugën më të shpejtë e më efikase që të mundësohen zgjedhjet e reja. Procedura tjetër për të kërkuar largimin nëpërmjet peticionit është tepër e gjatë dhe e pasigurt”, ka deklaruar mes të jerave diplomati spanjoll.

Në këtë drejtim, ai ka thënë se ka marrë garanci nga presidenti i Serbisë, Aleksandër Vuçiç, se serbët e Kosovës do të tregohen konstruktivë e do të angazhohen pa kushtëzime në procesin elektoral duke marrë pjesë në zgjedhjet e jashtëzakonshme në katër komunat veriore – Leposaviq, Zveçan, Zubin Potok dhe Mitrovicë e Veriut.

Ndryshe, kryeministrit Kurti po i kërkohet që të fillojë urgjentisht zbatimin e nenit shtatë të Marrëveshjese Bazë (Bruksel, 27 shkurt – Ohër, 18 mars) për normalizmin e marrëdhënieve me Serbinë, me të cilën parashihet një “nivel i përshatshëm i vetëmenaxhimit/vetëqeverisjes” për komunitetin serb.

Nga bashkësia e organizuar ndërkombëtare e përshkruajnë këtë “detyrë urgjente” dhe një ndër “hapat ekzistencial” për aspiratat euro-atlantike të Kosovës, ndërsa tash pritet hartimi i një draft-statuti nga Qeveria e Kosovës që do t’i hapte rrugë themelimit të Asociacionit të Komunave me shumicë serbe në Kosovë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.