Përfaqësuesi i Lartë i Bashkimit Evropian për Politikë të Jashtme dhe Siguri, Josep Borrell, ka kërkuar nga Kosova dhe Serbia që të angazhohen në dialogun që ndërmjetësohet nga Unioni, dhe ta përfundojnë të pa vonesë me një marrëveshje gjithëpërfshirëse.
Këtë, kryediplomati evropian e ka bërë gjatë një takimi që ka pasur me Ministrin e Punëve të Jashtme të Serbisë, Marko Gjuriç, të mërkurën, në Bruksel.
“Borrell përsëriti se BE-ja pret që Kosova dhe Serbia të angazhohen në dialogun e ndërmjetësuar nga BE-ja në mirëbesim dhe në frymën e kompromisit, dhe ta përfundojnë atë pa vonesë me një marrëveshje gjithëpërfshirëse, ligjërisht të detyrueshme për normalizimin e marrëdhënieve në përputhje me acquis e BE-së dhe të drejtën ndërkombëtare”, thuhet në njoftimin e BE-së.
Prioriteti kryesor, ka potencuar Borrell, është ecja përpara me zbatimin e Marrëveshjes për rrugën drejt normalizimit të marrëdhënieve (Bruksel më 27 shkurt, Ohër më 18 mars 2023).
“Borrell kujtoi se rruga përkatëse evropiane e Kosovës dhe Serbisë kalon përmes Dialogut”.
Gjuriç-i i ankohet Borrell-it për pozitën e serbëve në Kosovë
Ndryshe, takimet e niveleve të lartë të dialogut të 26 qershorit përfundouan pa ndonjë rezultat konkret, meqë Kryeministri i Kosovës, Albin Kurti refuzoi takimin me Presidentin e Serbisë, Aleksandër Vuçiç.
Kurti parashtroi tri kërkesa të cilat duhen plotësuar për vazhdimin e procesit të normalizimit.
Formalizimi i Marrëveshjes Bazë, tërheqja e letrës zyrtare të ish-kryeministres së Serbisë dorëzuar Bashkimit Evropian dhe dorëzimi i Milan Radojiçiç dhe grupit të tij paramilitar terrorist tek autoritetet kosovare, ishin tri kushtet e Kurtit.
Edhe takimi i nivelit të kryenegociatërove përfundoi pa ndonjë rezultat konkretë.
Kosova dhe Serbia gjatë vitit 2023 u dakorduan për Marrëveshjen Bazë dhe aneksin e zbatimit të saj, por që nga ajo kohë deri më sot ujdia s’u zbatua në terren.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
