Borrell: Kosova dhe Serbia, marrëveshje për dokumentet

“Në kuadër të dialogut të ndërmjetësuar nga Bashkimi Evropian, Serbia është pajtuar që të heqë dokumentet për hyrje-daljet për qytetarët me letërnjoftime të Kosovës dhe Kosova është pajtuar që të mos lëshojë dokumente të tilla për qytetarët që posedojnë karta të identitetit të Serbisë”.

Ka qenë ky njoftimi i dhënë nga shefi i diplomacisë së Bashkimit Evropian, Josep Borrell, pasditen e 27 gushtit.

Ai nëpërmjet një postimi në median sociale Twitter, thekson se më në fund Kosova dhe Serbia kanë arritur marrëveshjen për heqjen e dokumenteve mbi hyrje-daljet për shtetasit nga të dyja vendet.

Kështu sipas Borrellit, serbët e Kosovës, si dhe të gjithë qytetarët e tjerë, do të mund të udhëtojnë lirshëm ndërmjet Kosovës dhe Serbisë duke përdorur letërnjoftimet e tyre.

“BE-ja sapo mori garanci nga kryeministri i Kosovës, Albin Kurti për këtë”.

We have a deal.

Under the EU-facilitated Dialogue, Serbia agreed to abolish entry/exit documents for Kosovo ID holders and Kosovo agreed to not introduce them for Serbian ID holders.

(1/2)

— Josep Borrell Fontelles (@JosepBorrellF) August 27, 2022

Në deklaratën e tij Borrel ka falënderuar të dy liderët për këtë vendim. Kjo pasi – për përfaqësuesin e BE-së – tregon se palët dinë t’i zgjidhin problemet.

Po ashtu, menjëherë disa çaste pas dhënies së lajmit Borrell shkroi sërish duke e shfaqur lumturinë për arritjen e marrëveshjes.

Madje ai shtoi se pret të zgjidhen edhe çështje të tjera si ajo e targave.

Një reagim ka pasur edhe nga i dërguari i unionit për dialogun Kosovë-Serbi, Mirosllav Lajçak.

Ai ka falënderuar të dërguarin e Washingtonit për Ballkanin Perëndimor, Gabriel Escobar, për arritjen e kësaj marrëveshjeje.

“E falënderoj emisarin Escobar dhe diplomacinë amerikane për përkushtimin e fuqishëm të tyre në mbështetjen e dialogut të ndërmjetësuar nga BE-ja”, shkroi ai në Twitter.

I thank DAS Escobar and the 🇺🇸 diplomacy for their strong engagement in support of the 🇪🇺-facilitated Dialogue. https://t.co/6UqwpMh1Zn

— Miroslav Lajčák (@MiroslavLajcak) August 27, 2022

Nga ana tjetër, raportuesja për Kosovën në Parlamentin Evropian, Viola von Cramon, përpos mirëpritjes së marrëveshjes ka ravijëzuar se shpreson që të arrihet edhe marrëveshja përfundimtare mes Kosovës dhe Serbisë.

“Shpresojmë që zbatimi i shpejtë të çojë në gjetjen e zgjidhjes së targave të makinave dhe të na afrojë me marrëveshjen përfundimtare të normalizimit”, shkroi ajo në Twitter.

Good to hear that a deal has been reached under 🇪🇺 leadership with the unequivocal support of DAS Escobar 🇺🇸.

Hope that the swift implementation will lead to the finding of car licence plates solution and bring us closer to the final normalisation agreement. @MiroslavLajcak https://t.co/qFUce71tAm

— Viola von Cramon 🇺🇦🇪🇺 (@ViolavonCramon) August 27, 2022

Një reagim ka pasur edhe nga ish-i dërguari i SHBA-ve për dialogun Kosovë-Serbi, Richard Grenell.

Përmes një shkrimi në Twitter, Grenell shkruan se Albin Kurti arriti një marrëveshje të cilën ish-presidenti, Hashim Thaçi e kishte pranuar vite më parë.

“Kështu që, Albin Kurti ka rënë dakord për diçka që Hashim Thaçi ka rënë dakord vite më parë… Letërnjoftimet nga të dyja palët edhe një herë pranohen – por kësaj radhe Kurti thotë po. Ai po arrin – le të shpresojmë se do të fillojë të zbatojë edhe marrëveshjet e tjera të mëparshme”.

https://twitter.com/RichardGrenell/status/1563563844685172736

Ndërkombëtarët u angazhuan për të arritur një marrëveshje, pasi vendimi i 26 qershorit i Qeverisë së Kosovës për targat dhe dokumentet serbe shkaktoi përplasje në veri të vendit.

Kryeministri i Kosovës, Albin Kurti, shpesh ka deklaruar se ishte i gatshëm të hiqte dorë nga lëshimi i dokumentit për hyrje-dalje për shtetasit e Serbisë, nëse edhe Beogradi do të vepronte njësoj.

Ndërkohë sot, presidenti i Serbisë, Aleksandar Vuçiç, tha se Serbia do të pranonte dokumentet e Kosovës, vetëm nëse në kufi do të lëshohej një deklaratë ku bëhej e ditur se kjo nuk do të nënkuptojë njohjen e pavarësisë së Kosovës nga Serbia.