Borrell dhe liderët e Ballkanit Perëndimor takohen të mërkurën në drekë pune

Shefi i politikës së jashtme dhe sigurisë së Bashkimit Evropian, Josep Borrell të mërkurën do t’i presë në drekë pune liderët e Ballkanit Perëndimor në New York.

Lajmin e ka bërë të ditur Komisioni Evropian, në një deklaratë ku përshkruhen aktivitetet e javës së ardhshme të zyrtarëve të BE-së.

“Përfaqësuesi i Lartë i BE-së, do të organizojë një drekë pune tradicionale me gjashtë liderët e Ballkanit Perëndimor gjatë sesionit të 79-të të Asamblesë së Përgjithshme të Kombeve të Bashkuara”, thuhet në njoftim.

Teksa, theksohet se fokusi i BE-së do të jetë trajtimi i konflikteve dhe krizave në të gjithë botën.

Presidentja e Komisionit Evropian (KE), Ursula von der Leyen, të enjten i ka mbledhur liderët e vendeve të Ballkanit Perëndimor në një drekë pune në Bruksel për planin e rritjes ekonomike prej 6 miliardë eurosh – një paketë madhore e asistencës financiare për periudhën 2024-2027 – ndërsa pjesëmarrjen e kanë konfirmuar tashmë të gjashtë udhëheqësit rajonalë.

Përveç kryeministrit të Kosovës, Albin Kurti, dhe kryeministrit të Shqipërisë, Edi Rama, në ngjarje kanë marrë pjesë edhe presidenti serb, Aleksandar Vuçiç, kryeministri maqedonas, Hristjan Mickoski, kryeministri malazez, Millojko Spajiç, dhe kryetarja e Këshillit të Ministrave të Bosnje-Hercegovinës, Borjana Krishto.

Të enjten, kryeministri i Kosovës Albin Kurti, ka kërkuar nga presidentja e Komisionit Evropian, Ursula von der Leyen, që të heqen masat mbi Kosovën, pasi sipas tij janë “të padrejta dhe jo fer”.

Përveç kësaj Kurti gjatë vizitës së tij në Bruskel ka kërkuar që aplikimi i Kosovës në Bashkimin Evropian të trajtohet.

“Kryeministri Kurti bëri thirrje që të trajtohet aplikimi i Kosovës në Bashkimin Evropian dhe Kosovës t’i jepet pyetësori dhe statusi i vendit kandidat për anëtarësim”, thuhet në komunikatën e Zyrës së Kryeministrit.

Sa i përket Planit të Rritjes, kreu i ekzekutivit u shpreh se Kosova ka qenë një ndër vendet e para që ka dorëzuar Agjendën e Reformave, duke treguar kështu përkushtimin e saj për Planin e Rritjes.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.