Boris Pistorius do të jetë ministri i ri gjerman i Mbrojtjes

Një emër relativisht i panjohur është ai i Boris Pistorius, politikanit gjerman nga radhët e Partisë Socialdemokrate të kancelarit Olaf Scholz, por ai do të jetë i mandatuari i Kancelarisë për të marrë postin e Ministrit të ri gjerman të Mbrojtjes.

Aktualisht ai mban postin e ministrit të brendshëm rajonal për Saksoninë jugore.

Lajmin e kanë bërë të ditur burime pranë Qeverisë gjermane, për Agjencinë Franceze të Lajmeve AFP.

Ky emërim vjen pas dorëheqjes së paraqitur nga ish-ministrja, Christine Lambrecht, më 16 janar.

Tërheqja e saj erdhi në formë të parevokueshme, pas kritikave të shumta që ka marrë lidhur me qëndrimin e Berlinit kundrejt luftës në Ukrainë.

Në letrën e dorëheqjes të prezantuar për kancelarin gjerman, Olaf Scholz, Lambrecht bën me dije se për shkak të vëmendjes së madhe mediatike kundrejt personit të saj, u la mënjanë vërtetimi i fakteve dhe debati i qëmotshëm në Gjermani, lidhur me modernizimin e Ushtrisë dhe shtimin e kapaciteteve.

“Puna e vyer dhe e vlefshme e ushtarëve dhe shumë njerëzve në departamentin ku unë punova, duhet të vijojë më tej”, shkruan 57-vjeçarja në letrën e saj, e cila e mori mandatin nga kancelari Scholz në dhjetor 2021.

Për kritikë të shumtë, Lambrecht nuk ka qenë figura e duhur për t’u vendosur aty, për shkak se asaj i mungon ekspertiza mbi fushën.

Mirëpo, vetë Scholz, e ka mbështetur fuqimisht postin e saj, duke e quajtur madje edhe një ministre mbrojtjeje të “klasit të parë”.

Çasti në të cilin ajo tërhiqet gjithsesi, mbetet kritik, pasi Gjermania ka vendosur më në fund të ndihmojë konkretisht me mjete të rënda ushtarake, në një paketë të përbashkët me SHBA-të, ku tanket Leopard zënë vendin kryesor në gjithë dinamikën, së bashku me sistemet anti-raketore amerikane Patriot.

Përtej një stepjeje fillestare, Berlini i ka dhënë Kievit mbështetje thelbësore në përballimin e agresionin rus, duke përfshirë edhe paketat ekonomike që janë dërguar për qytetarët ukrainas.

Fati i Lambrecht ndërkohë ndjek atë të shumë ministrave të mëparshëm të Mbrojtjes në Gjermani, mandati i të cilëve është përmbyllur në mënyrë të parakohshme.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.