Boris Johnson dënon abuzimin racist të futbollistëve të Anglisë

Fyerjet raciste të futbollistëve të Anglisë nga tifozët e tyre, janë komentuar negativisht nga shumë figura të njohura.

Mes tjerësh edhe kryeministri Boris Johnson, ka dënuar ashpër abuzimin racist ndaj futbollistëve të Anglisë, pas humbjes së tyre në finalen e Kampionatit Evropian, ndaj Italisë.

“Kjo skuadër e Anglisë meriton të lavdërohen si heronj, e jo të abuzohen për racizëm në mediat sociale. Ata që janë përgjegjës për këtë abuzim të tmerrshëm duhet të turpërohen nga vetja e tyre”, ka thënë Boris Johnson.

This England team deserve to be lauded as heroes, not racially abused on social media.

Those responsible for this appalling abuse should be ashamed of themselves.

— Boris Johnson (@BorisJohnson) July 12, 2021

Pa reaguar nuk ka mbetur as Federata e Futbollit të Anglisë, të cilët përmes një postimi në twitter kanë dënuar sulmin racist që iu është bërë lojtarëve të tyre.

“Jemi të neveritur nga disa persona që kanë abuzuar me lojtarët tanë pas ndeshjes finale. Ata dhanë gjithçka për këtë fanellë gjatë Evropianit. Ne qëndrojmë me futbollistët tanë.”

“Kompanitë e mediave sociale duhet të marrin përgjegjësi dhe veprime për të ndaluar këto akte të tmerrshme. Duhet të mbledhin prova që mund të çojnë në ndjekje penale ndaj këtyre personave”, thuhet në deklarimin e Federatës.

Këto ofendime raciste do të ndiqen edhe nga Policia e Anglisë, të cilët thanë se do të hetojnë ofendimet në rrjetet sociale që iu bënë futbollistëve anglezë.

“Jemi të vetëdijshëm për komentet fyese dhe raciste që iu bënë futbollistëve përmes rrjeteve sociale, pas finales së Euro 2020. Ky abuzim është plotësisht i papranueshëm, nuk do të tolerohet dhe do të hetohet”, thuhet në deklaratën e Policisë.

Kujtojmë që shumë tifozë anglezë kanë reaguar ashpër me fyerje raciste ndaj futbollistëve Bukayo Saka, Marcus Rashford e Jadon Sancho, të cilët dështuan të shënojnë nga pika e bardhë, pas ekzekutimit të penaltive.

Dhe, përveç personave të lartcekur, shumë figura të njohura në botë kanë dënuar ashpër këto komente raciste të tifozerisë angleze.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.