Borell për “Open Balkan” – “Duhet të jetë gjithëpërfshirës”

Shefi i politikës së jashtme të Bashkimit Evropian, Josep Borell, tha se bashkëpunimi rajonal është tejet i rëndësishëm dhe pjesë integrale e procesit të Stabilizim-Asociimit.

Këtë koment ai e bëri për “Vijesti”-n e Podgoricës kur u pyet rreth iniciativës rajonale të “Ballkanit të Hapur”.

Mirëpo, çfarë duket sheshit është se gazeta në fjalë në pyetjen e saj e merr si të mirëqenë që Mali i Zi dhe Bosnje-Hercegovina e mbështesin “Ballkanin e Hapur” dhe se “vetëm Kosova jo”.

“Si e sheh BE-ja Ballkanin e Hapur? Zyrtarët e BE-së thonë se ajo duhet të jetë gjithëpërfshirëse dhe Kosova refuzon të anëtarësohet. A do të thotë kjo se nuk do të ketë mbështetjen e BE-së?”. Kështu ishte formuluar pyetja e Vijesti-t.

“Angazhimi i liderëve për bashkëpunimin rajonal është një element thelbësor i perspektivës evropiane të Ballkanit Perëndimor dhe një pjesë integrale e Procesit të Stabilizim Asociimit. E kuptoj plotësisht dëshirën për të ecur përpara”, u përgjigj Borell.

“Në të njëjtën kohë, një proces që përfshin të gjithë rajonin e Ballkanit Perëndimor është thelbësor. Në këtë kontekst, është e rëndësishme që rajoni të bëjë përparim në krijimin e një tregu të përbashkët rajonal, që është një angazhim politik i bërë nga gjashtë liderët e rajonit në samitin në Sofje. Nëpërmjet Planit Ekonomik dhe Investimeve, ne po sjellim mundësi të konsiderueshme investimi në rajon”.

“Tani i takon rajonit t’i përdorë ato mirë duke realizuar potencialin e tij të plotë ekonomik dhe duke krijuar një treg të përbashkët rajonal bazuar në rregullat e BE-së”, tha mes tjerash Josep Borell.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.