Brenda Bashkimit Evropian nuk ka pajtim për heqjen e plotë të masave ndëshkuese ndaj Kosovës të vendosura para një viti, por si kompromis pritet që këto masa të hiqen pjesërisht dhe gradualisht.

Kështu ka mësuar “Radio Evropa e Lirë” nga burimet diplomatike brenda Unionit, pas diskutimeve që u zhvilluan më 19 qershor në Komitetin për Politikë dhe Siguri të BE-së (PSC), ku morën pjesë përfaqësuesit e shteteve anëtare të bllokut.

Sipas burimeve të REL-it, shumica e vendeve anëtare të BE-së kanë qenë pro heqjes së plotë të masave, siç ka rekomanduar kryediplomati evropian, Josep Borrell, në raportin që ua dorëzoi vendeve anëtare më 18 qershor, lidhur me hapat që ka ndërmarrë Kosova për shtensionim të tensioneve në Veri – të banuar me shumicë serbe.

Në raportin e tij, Borrell ka rekomanduar që Kosovës t’i hiqeshin masat, ndërkaq Prishtina të shfrytëzojë këtë mundësi për të vepruar në mënyrë që të ulen tensionet dhe që të shmangë veprimet e pakoordinuara.

Siç raporton REL, disa vende të BE-së janë shprehur se “përmbushja e kërkesave nga ana e Kosovës nuk ka qenë e plotë” dhe aktualisht këto shteteve nuk pajtohen që Kosovës t’i hiqen të gjitha masat.

Diplomatët e BE-së, me të cilët ka kontaktuar REL, thanë se në ditët në vijim mund të pritet edhe një deklaratë në emër të BE-së, përmes së cilës do të njoftohet për gatishmërinë e heqjes graduale dhe të pjesshme të masave ndaj Kosovës.

Ende nuk ka informacione të hollësishme se cilat masa do të mund të largoheshin e cilat jo, por diplomatët e BE-së janë të mendimit se fillimisht mund të hiqen masat që kanë të bëjnë me shfrytëzimin e mjeteve financiare nga Instrumentet e Para Anëtarësimit (IPA), të cilat janë pezulluar për Kosovën.

Ndryshe, masat ndëshkuese ndaj Kosovës ishin vendosur një vit më parë, për shkak të veprimeve të qeverisë në Veri të vendit, çka kishte krijuar tensione në atë pjesë të vendit të banuar me shumicë serbe.