Blinken: Berisha u shpall ‘non grata’ në një proces normal

Sekretari amerikan i Shtetit, Antony Blinken është pyetur në Komisionin e Punëve të Jashtme të Shtëpisë së Bardhë për shpalljen ‘non grata’ të ish-kryeministrit të Shqipërisë, Sali Berisha.

Kongresmeni republikan Lee Zeldin i ka kërkuar Blinkenit informacione specifike për vendimin ndaj Berishës, duke e cilësuar Berishën si aleat të George Bush dhe kundërshtar të George Soros.

Ai ka theksuar se ka bërë dhe vetë hulumtime, por s’ka gjetur se në çfarë afere korruptive mund të ishte përfshirë politikani shqiptar.

Blinken, nga ana tjetër theksoi se procesi u zhvillua normalisht, përfshirë avokatët e tij.

Ai ka sqaruar se momentalisht nuk mund të ndajë asgjë me kongresmenin për këtë çështje, por nëse ai kërkon më shumë informacion mund të paraqitet në Zyrën e Legjislacionit apo në Zyrën e Zëdhënësit për Çështjet Publike.

Sipas sekretarit amerikan, procedurat për t’ia ndaluar Sali Berishës hyrjen në Shtetet e Bashkuara të Amerikës janë zhvilluar në një proces normal.

“SHBA-ja vijojn të shohë përtej kufijve për ata persona të përfshirë në korrupsion që sfidojnë parimet e demokracisë”.

Shpallja ‘non grata’

Antony Blinken, e ka shpallur ish-kryeministrin dhe ish-presidentin shqiptar, Sali Berisha, si persona non-grata në SHBA, së bashku me familjen e tij më 19 maj.

Njoftimin për këtë ai e ka shpërndarë përmes llogarisë së tij në Twitter, pasi lajmi ishte publikuar edhe nga Departamenti Amerikan i Shtetit.

“Po e adresoj zyrtarisht Sali Berishën dhe familjen e tij si të papërshtatshëm për t’u futur brenda SHBA-ve. Mbetemi të bashkuar në luftën kundër krimit të organizuar me partnerët tanë shqiptarë”.

Në deklaratën e lëshuar nga Departamenti Amerikan i Shtetit është e përshkruar edhe baza ligjore në të cilën përshkruhet shpallja non grata.

Tre familjarët e tjerë të familjes Berisha, të ndaluar për të hyrë në SHBA, janë bashkëshortja e tij, Liri Berisha, djali Shkëlzeni dhe vajza Argita.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.