Ish-kryeministri i Britanisë së Madhe, Tony Blair, ka deklaruar se ndërhyrja e aleatëve të NATO-s në vitin 1999 ka qenë e nevojshme dhe se ekzistenca e shtetit të pavarur të Kosovës është dëshmi e kësaj, prandaj nuk është penduar asnjëherë që e ka ndihmuar Kosovën në momentet më të vështira.

Blair ka kujtuar të rënët për liri, udhëheqësit e atëhershëm të Kosovës, posaçërisht presidentin historik, Ibrahim Rugova, bashkëpunëtorët e ngushtë dhe aleatët e NATO-s nën udhëheqjen e Shteteve të Bashkuara të Amerikës (SHBA), duke shprehur mirënjohje të përjetshme për të gjithë ata që kontribuuan në jetësimin e idealit shekullor të shqiptarëve të Kosovës.

“Sot dhe përgjithmonë, kujtojmë ata që dhanë jetën për lirinë e këtij vendi… Falënderoj të gjithë ata që punuan me mua, në veçanti presidentin Rugova, sekretarin [e përgjithshëm të NATO-s, Javier] Solana, kryeministrin italian [Massimo] D’Alema, gjeneralin [Wesley] Clark, gjeneralin [Micheal] Jackson dhe sigurisht, lidershipin vital të presidentit [Bill] Clinton”, ka thënë ai.

“Ne i dhamë fund një makthi atëherë, por mund të ndërtojmë një ëndërr tani. Kjo është ajo që i detyrohemi kujt kujtojmë sot. Kjo është ajo që ata do të dëshironin. Kjo do të ishte dhurata më e madhe për ata që e bënë detyrën e tyre atëherë – që ne të ndjekim shembullin e tyre dhe të bëjmë detyrën tonë tani. Për popullin, për të ardhmen dhe për këtë komb të mrekullushëm”.

Blair, i cili për shqiptarët e Kosovës është më shumë se një ish-kryeministër britanik, ka shtuar ndër të tjera se e ardhmja e Kosovës është në Bashkimin Evropian (BE). Ai u ka bërë thirrje të gjitha shteteve që ende nuk e kanë njohur ta bëjnë këtë: “Kjo është pse kemi shtrirë dorën tonë para 25-vjetësh”.

Ish-kryeministri britanik, përpara se t’i drejtohej deputetëve kosovarë, takoi edhe presidenten e Kosovës, Vjosa Osmani, ku bombardimin e Serbisë para 25-vjetësh e cilësoi të duhur: “Atëherë besova se [fushata e NATO-s] ishte gjëja e duhur për të bërë – jam i bindur se ishte gjëja e duhur edhe tash. Dhe besoj se ne duhet të vazhdojmë të qëndrojmë përkrah popullit të Kosovës”.

Ndryshe, ndërhyrja humanitare e NATO-s më 1999 konsiderohet një ndër sukseset më të rëndësishme të aleancës ushtarake të udhëhequr nga SHBA-ja, përkundër se përbente rastin e parë në histori që NATO-ja ndërmerrte një veprim ushtarak në territorin evropian. Bombardimet e NATO-s mbi Serbinë përfunduan pas 78 ditëve, ndërsa lufta në Kosovë pas 14 muajve.