Bitcoin, kur nevoja kthehet në biznes

Fillimi i marsit të 2020-ës do të mbetet gjatë në kujtesën e gjithë shqiptarëve, si periudha kur Shqipëria regjistroi rastet e para të infektimit me COVID-19.

Një sërë masash u ndërmorën në atë kohë. Fillimisht, qeveria mbylli shkollat. Më pas, gradualisht, bizneset dhe më vonë u vendos edhe karantina. Por sa ndikoi kjo në xhepat e shqiptarëve?

Florian K. një djalosh nga Shkodra, i cili punonte si ndihmëskuzhinier tek një restorant peshku në Tiranë, mbeti i papunë.

“Nuk isha as i regjistruar në shtet, prandaj nuk përfitova as pagën e luftës”, tregon Floriani.

Nevoja për të ardhura, qiraja për t’u paguar dhe plot kohë të lirë në dispozicion, shkodrani u hyri leximeve në internet për kriptovalutat. Për Albanian Post, ai rrëfen sesi nga kurioziteti, etja për të mësuar më shumë rritej dita-ditës.

“U fiksova! Nuk më zinte gjumi deri në 3 të natës nga dëshira për të mësuar sa më shumë”, u shpreh ai.

Pas orëve të tëra leximesh dhe kërkimesh, Floriani ra në kontakt me V.P., i cili punonte si menaxher. Ky i fundit shiste procesorë dhe karta grafike për prodhimin e kriptovalutave, Ethereum (ETH) konkretisht.

Floriani tregon sesi së bashku me shokun e dhomës si “partner” vendosën që të gjitha kursimet që kishin, por edhe me disa pará të marra borxh dhe plot dëshirë për të bërë pará vendosën që t’i blinin procesorët. Një shumë e konsiderueshme për dy të rinj: 2 mijë e 750 euro totali. Kaq i kishin kushtuar pajisjet së bashku me instalimin dhe mirëmbajtjen, sipas tij.

“Kishim pak frikë, sepse dihet, rrezik i madh. Po shpenzonim shumë lekë. Shumica prej tyre s’ishin as tonat”, thotë Floriani.

“Sapo i blemë pajisjet, na kanë bërë pjesë e një grupi në WhatsApp. Tek ai grup shkruajmë çdo problem që mund të kemi me pajisjet dhe vijnë e na i rregullojnë. Paguajmë 90 euro në muaj për asistencën”.

Në prill të vitit të kaluar, muaji kur Floriani me shokun e tij të shtëpisë blenë procesorët e minimit të Ethereum-it, çmimi i kësaj monedhe ishte rreth 180 dollarë një. Momentalisht, sipas faqes së lajmeve të specializuar në kriptovaluta, CoinDesk, çmimi i saj kap vlerën e 1 mijë e 520 dollarëve.

“Jemi shumë të habitur dhe të gëzuar njëkohësisht”, foli me të drejtë shkodrani.

Sipas llogarive të bëra në prill, Flori tha se nxirrte rreth 11 dollarë në ditë vlerë ETH dhe e llogariste që brenda 17 muajve të nxirrte shpenzimet e pajisjeve (së bashku me shpenzimet e rrymës elektrike). Por, çmimi i ETH-së u rrit dhe në të njëjtin stad edhe lumturia e dy të rinjve. Përllogaritjet momentalisht tregojnë se sot gjenerojnë rreth 102 dollarë në ditë.

Flori nënvizoi se ETH-të e tij do t’i ruajë, pasi ka besim se çmimi do të rritet përsëri, kurse për shokun e tij la të nënkuptohej se i konverton në euro për shkak se është skeptik.

Albanin Post kontaktoi edhe me shitësin e kartave grafike. Ai preferoi të mbetej anonim, por gjithsesi sqaroi procesin e tyre.

Shitësi i kartave grafike pranoi se i blinte ato online dhe i shiste në tregun shqiptar.

“Kartat grafike dhe procesorët për të minuar kriptovaluta blihen edhe në eBay, por duhet t’i njohësh mirë se cilët janë ata që ia vlejnë. Për vete i blej në website të tjera. Janë të besueshëm dhe procesorët pak të përdorur. Vendi nga ku i blej është kryesisht Kina”.

V. pohoi se minimi dhe konvertimi i monedhave kripto është i ligjshëm në Shqipëri. Por, fitimi nga minimi varet nga pagesa e rrymës elektrike dhe çmimi i monedhës në treg.

“Për shembull, përllogaritet afërsisht 3 milionë lekë (të rinj) faturë e rrymës elektrike, për të minuar një Bitcoin. Çmimi i Bitcoin momentalisht është diku te 47 mijë dollarë”.

Menaxheri foli edhe për personat, të cilët investojnë në krijimin e kriptomonedhave. Ai tha se klientët e tij vijnë nga nivele të ndryshme klasore. Disa nga ata persona, vijoi V., të cilët më parë janë marrë me lojëra fati, tani janë zhytur në tregun e kriptovalutave.

“Disa të tjerë vijnë nga bota e biznesit, apo edhe ajo e televizionit”, tha V.

Fenomeni i kriptovalutave është përhapur shumë kohët e fundit. Në Shqipëri, janë disa persona të cilët ofrojnë shërbime të tilla si këmbime të kriptomonedhave apo shitje të pajisjeve prodhuese të tyre.

Opinioni publik

Opinioni publik është i ndarë në dy këndvështrime, krejtësisht të ndryshme.

I pari e përcakton të gjithë tregun e kriptovalutave si spekulativ, kryesisht monedhën Bitcoin. Ato janë të mendimit se nuk do të zgjasë dhe se njerëzit do t’i humbasin të ardhurat e tyre.

Nga ana tjetër, optimistë për kriptovalutat janë kryesisht investitorët. Çdo biznes, sipas tyre, nga më i madhi tek më i vogli do të angazhohet që të ofrojë shërbime në këmbim të valutave elektronike, ashtu siç ndodh sot me kartat e kreditit apo paratë e thata.

Ky është ripublikim i artikullit me datë 23 shkurt 2021.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.