Bislimi: S’jam i shqetësuar për një fitore të mundshme të Trump në SHBA – qasja ndaj Kosovës s’është produkt i preferencave të individëve

Zëvendëskryeministri i Kosovës, Besnik Bislimi, ka deklaruar se nuk është i shqetësuar për një fitore të mundshme të ish presidentit të Shteteve të Bashkuara të Amerikës, Donald Trump, kjo pasi që sipas tij qasja ndaj Kosovës nuk është produkt i preferencave të personave.

Ai në një intervistë për ‘Euroactiv’ ka thënë se bashkëpunimi Kosovë – SHBA s’mund të ndryshohet pavarësisht personit që vjen në pushtet.

“Qasja ndaj Kosovës nuk është domosdoshmërisht produkt i preferencave të individëve, ajo është e ngulitur në historinë e SHBA-së dhe nuk mund të ndryshohet”, ka deklaruar ai.

Edhe pse nga këndvështrimi i tij disa politikanë vijnë dhe shkojnë disa prej tyre mund edhe të shkaktojnë dëme si ish-i dërguari special i Shteteve të Bashkuara të Amerikës për dialogun Kosovë – Serbi, Richard Grenell

“Disa individë, si ish-i dërguari i SHBA-së në Kosovë gjatë epokës së Trump, Richard Grennell, mund të shkaktojnë dëme”.

“Por, pavarësisht dëmit që mund të shkaktojnë këta njerëz, kjo nuk ndikon në aleancën afatgjatë ndërmjet Kosovës dhe SHBA-së. SHBA-ja mbetet partneri më i fortë që kemi ndërkombëtarisht dhe kjo nuk do të ndryshojë me zgjedhjet e ardhshme”, tha Bislimi.

“Nëse Serbia njeh pasaportat e Kosovës, Spanja nuk mund të refuzoj”

Zëvendëskryeministri, tha gjithashtu se kur BE-ja i propozoi Kosovës marrëveshjen bazë për normalizimin e marrëdhënieve, kjo u bë me premisën se do të zgjidhte 99% të çështjeve të pazgjidhura dhe rezultati kryesor ishte menduar të ishte heqja e pengesës, e cila vjen nga pesë mosnjohësit.

Por Bislimi, tha se njohja e tyre nuk duhet të jetë një “produkt” i procesit të normalizimit me Serbinë, por duhet të jetë një “input”.

“Nëse e mbani progresin me jo-njohësit si rezultat i procesit, ju e bëni përparimin të pamundur dhe do të ishte joracionale që Serbia të jetë konstruktive në dialog nëse e dinë se do të ketë një kosto të lartë për ta”.

Sipas tij, nëse Serbia njeh pasaportat e Kosovës, Spanja nuk mund të refuzojë.

“Nëse Serbia njeh pasaportat e Kosovës, Spanja nuk mund të thotë jo, ne nuk duam t’i njohim pasaportat e Kosovës. Nëse Serbia thotë, unë do të nënshkruaj një marrëveshje ku Kosova dhe Serbia e shohin veten si dy palë të barabarta, Sllovakia nuk mund të thotë jo”, tha ai.

“Kosova ka më shumë shkëmbime me Greqinë se shumica e vendeve të BE-së”

Nga pesë vendet që nuk e njohin Kosovën është edhe Greqia, e sipas zëvendëskryeministrit Bislimi, Kosova ka më shumë shkëmbime me Greqinë se shumica e vendeve të Bashkimit Evropian.

“Ndërsa Greqia nuk e njeh pavarësinë e Kosovës, shkëmbimet politike, ekonomike dhe kulturore me Greqinë janë më shumë sesa me shumicën e anëtarëve të BE-së që kanë e njohur atë”.

Për mosnjohjen e Greqisë, ai shtoi se duhet të kenë arsyet e veta se përse nuk po e njohin Kosovën.

“Ne e kuptojmë se pesëshja jo njohës e BE-së ka pesë situata specifike brenda tyre dhe kjo është arsyeja pse ne nuk mund të përdorim të njëjtin ilaç ose të njëjtën qasje për të gjithë”.

Në situatën aktuale për pranimin e Kosovës në BE, ai është shprehur se do të pengohej nga mosnjohja e pesë vendeve.

“Pranimi i Kosovës në BE do të pengohej nga mosnjohja e Spanjës, Sllovakisë, Qipros, Greqisë dhe Rumanisë, secila me rezerva të ndryshme, kryesisht të bazuara në mosmarrëveshje territoriale ose të pavarësisë”.

Bislimi konsideroi se nuk ka asnjë ministër të jashtëm në Evropë që e ka vizituar Kosovën më shpesh sesa ai i Greqisë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.