Bislimi për dështimin e marrëveshjes për Elektroseverin: Jemi ankuar te BE-ja tashmë

Zëvendëskryeministri i Kosovës, Besnik Bislimi ka bërë të ditur në Komisionin për Integrime Evropiane se janë ankuar ne Bashkimin Evropian për dështimin e marrëveshjes për Elektroserverin.

“Për Elektroseveri i kemi dërguar Bashkimit Evropian letër që nuk e ka përmbushur afatin prej 100 ditësh, tash është edhe ajo koha shtesë dhe do të presim a do t’i hiqet licenca kësaj kompanie”.

Ai tutje presionin e Serbisë në Kosovë e ka quajtur si “të tmerrshëm”.

“Fatkeqësisht ka një presion të tmerrshëm prej Serbisë përmes strukturave të saj kriminele që i mban në Kosovë tek qytetarët serb, duke i frikësuar ata, duke i shantazhuar në mënyrë që të mos i konvertojnë veturat e tyre”.

Ndër të tjera, Bislimi ka kërkuar që të mos diskutohet për data sa i përket liberalizimit të vizave ndaj Kosovës.

“Mendojmë që pika që mbulon Kosovën do të jetë në agjendë më 13 tetor. Ky është hapi i parë por jo i fundit pasi që janë 5 hapa të tjerë. Është e panevojshme që të dalim me data të caktuara se kur kund të ndodhë liberalizimi i vizave” – deklaroi Bislimi.

I pyetur nga deputetja e Partisë Demokratike të Kosovës, Blerta Deliu Kodra, lidhur me rritjet ekonomike brenda vitit në Kosovë, Bislimi konsideron se ka pasur rritje të “paparë” në shumë sektorë.

“Ne mendojmë që me rritë ekonominë me 10.7 për qind brenda një viti është progres i paparë kështu duhet të definohet. Me rrit numrin e të punësuarve në sektorin privat sipas të dhënave AKT-së, prej 35 mijë është 11 për qind e fuqisë punëtorët nuk është pak është shumë”.

“Me i rrit të hyrat buxhetore prej 33 për qind nuk është pak është e paparë deri tash, me i rrit eksportet prej 67 për qind nuk është pak është e paparë dhe më këto matet progresi, matet me numra dhe statistika”.

Bislimi i ka kujtuar Deliut edhe arsyjen se pse është thirrur në këtë komision.

Sipas tij, është e paarsyeshme pyetjet që i shtrohen për çështjet të cilat nuk është vetëm ai përgjegjës.

“Temat janë për Integrime Evropianë. Nëqofse më thirrni të raportoj, unë raportoj për koncept-dokumente, për projektligje jo për bindje politike. Tash po thoni le ato janë të tjera nuk po na interesojnë ato janë kotë. Po për atë më keni thirrur që të raportoj, më keni thirrur të raportoj e jo të diskutoj sepse për diskutime diskutojnë deputetet mes veti”.

Edhe, deputetja e AAK-së, Time Kadrijaj ka kërkuar nga Bislimi të dijë se pse vazhdimisht ka mungesë të raportimit për zhvillimet në dialogun Kosovë-Serbi.

Bislimi kërkoi që deputetët të kenë mirëkuptim në këtë aspekt.

“Nuk është duke ndodhur diçka prapa perdes për të cilën ne nuk duam të informojmë partnerët legjislativ. Mirëpo ka shume elemente të cilat nuk mund të dalin ne publik për arsyeje se e rrezikojnë mbarëvajtjen e procesit, duhet të kemi mirëkuptim që dialogu është temë e ndjeshme”.

Lajmi në përditësim…

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.