Bislimi në Bruksel: Diskutuam opsione për targat

Zëvendëskryeministri i Kosovës, Besnik Bislimi, gjatë së martës është takuar me Përfaqësuesin e Posaçëm të Bashkimit Evropian për dialogun Kosovë-Serbi, Miroslav Lajçak, me të cilin kanë diskutuar opsionet për konvertimin e suksesshëm të të gjitha targave ilegale serbe, në ato legale.

Bislimi theksoi rëndësinë e fokusimit të bisedimeve në normalizimin e plotë të marrëdhënieve ndërmjet Kosovës dhe Serbisë, si dhe de-eskalimit të situatë në pjesën veriore të vendit.

“Nuk duhet të lejojmë shpërqendrime të qëllimshme nga bisedimet për normalizimin e plotë nga veprime që synojnë përshkallëzimin në terren”, thuhet në njoftimin e Qeverisë së Kosovës.

“Kosova mbetet e përkushtuar ndaj dialogut parimor dhe jemi të interesuar të ndërtojmë marrëdhënie të mira me të gjithë fqinjët tanë”.

Gjithashtu, Bislimi  përsëriti interesimin për të vazhduar me takime të rregullta në Bruksel, për elementet e normalizimit të plotë të marrëdhënieve, me njohjen reciproke në qendër.

Ndryshe, Lajçak përmes një cicërime në rrjetin social Twitter, pas takimit që ka pasur me kryenegociatorin e palës kosovare, kishte deklaruar se çdo përshkallëzim i situatës apo dhuna eventuale si pasojë e këtij përshkallëzimi është e papranueshëm.

“Ne kemi nevojë urgjente për të gjetur një zgjidhje për të garantuar sigurinë dhe stabilitetin në terren”.

Ndryshe gjatë ditës Albanain Post, nga burime diplomatike, ka raportuar se tashmë është arritur akord në parim për de-eskalim të situatës dhe më së largu të premten (18 nëntor) palët do të dalin për të treguar detajet, ose të paktën njoftimin zyrtar për dakordim.

AP kishte kuptuar se pala kosovare ka pranuar që të spostojë vendimin për targat pas kërkesave të shumëhershme të Bashkimit Evropian dhe Shteteve të Bashkuara të Amerikës, por për këtë lëshim ka kërkuar një garanci nga partnerët.

Marrëveshja për De-eskalim

Albanian Post ka raportuar me 9 nëntor se nga ndërkombëtarët është ofruar një propozim me tri pika.

Propozimi është diskutuar, siç njoftoi edhe kryediplomati Josep Borrell, edhe në Paris, në takimet e ndara me kryeministrin e Kosovës, Albin Kurti dhe presidentin serb, Aleksandër Vuçiç.

Pika e parë e propozimit ndërkombëtar për të dalur nga kriza aktuale ishte që “të dyja palët duhet ta konfirmojnë përkushtimin e tyre për planin Franko-gjerman dhe të dyja palët të kthehen në negociata”.

Në pikën dy bëhet një kërkesë eksplicite për qeverinë e Serbisë.

“Serbia pajtohet se kërkesa për Asociacionin e Komunave me Shumicë Serbe duhet të diskutohet vetëm përbrenda tërësisë së planit Franko-gjerman – pra, si pjesë e strukturës së përgjithshme të planit”, thuhet në propozimin ndërkombëtar në të cilin ka pasur qasje AP.

Pika e tretë është një tjetër kërkesë, por për Kosovën.

“Kosova pajtohet që të zbusë masat në raport me çështjen e targave”, pohon propozimi.

Synim i këtyre tri pikave në formë të kërkesave nga ndërkombëtarët është qetësimi i situatës në terren, kthimi i normalitetit dhe krijimi i mundësisë për vazhdim të dialogut në Bruksel.

Është gjetur gjuhë e përbashkët në Bruksel, deri të premten prezantohet zgjidhja

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.