Zëvendëskryeministri i Kosovës, Besnik Bislimi, në një konferencë për media ka thënë se brenda Bashkimit Evropian “ka një dakordim informal” se masat ndëshkuese ndaj Kosovës – që ishin vendosur si pasojë e veprimeve të qeverisë në Veri – “janë të padrejta dhe të dëmshme”.

“Tani, sesi do ta gjejnë ata mekanizmin për largimin e këtyre masave dhe momentin e duhur i takon Komisionit Evropian”, tha Bislimi në këtë konferencë, ku në pjesën e parë të saj ishte prezent edhe Kryeministri Albin Kurti.

“Ajo çka është e pasaktë është që për këtë kërkohet votim në Këshillin e BE-së. Masat as nuk janë vendosur në Këshillin e BE-së, as nuk hiqen me votim”, shtoi.

Në konkluzionet e miratuara nga Këshilli Evropian në mbledhjen e së enjtes dhe të së premtes kanë shprehur “keqardhje” për mungesën e zbatimit nga Kosova dhe Serbia të Marrëveshjes Bazë (Bruksel, më 27 shkurt, Ohër, 18 mars), të ndërmjetësuar nga Bashkimi Evropian, si dhe kanë paralajmëruar “pasoja” për palët në rast të refuzimit të uljes së tensioneve.

Mirëpo, sipas Bislimit, ky paralajmërimi nuk është për Kosovën, pasi që kjo e fundit është nën masa që nga qershori.

“Kosova është nën masa, diskutimi është për masat që mund të ndërmerren në rast të mos qasjes konstruktive të Serbisë, ose në rast se hetimet përfundojnë me një konstatim se prapa sulmit terrorist të 24 shtatorit qëndron Serbia…”, theksoi numri dy i qeverisë.

Jo për Kosovën, insistoi ai, “sepse Kosova nuk ka qenë shkaktare e sulmit të 24 shtatorit”.

“Masat do t’i vendosen Serbisë në rast se konstatohet [se qëndron prapa sulmit terrorist]”, tha ai, duke treguar se edhe nëse vendosen masat ndaj Serbisë, nuk do të jenë të tipit të sanksioneve, meqë, sipas tij, “ka një vend brenda BE-së që kategorikisht ka një vend do ta refuzojë vendosjen e sanksioneve”.

Prandaj, pohoi, “masat pritet të jenë ato që lidhen me integrimin evropian dhe mbështetjen financiare që Serbia merr nga BE-ja”.

Pas sulmit terrorist në Banjë të Zveçanit, ku mbeti i vrarë rreshteri Afrim Bunjaku, Kosova, pasi ka akuzuar drejtpërdrejtë Serbinë se qëndron prapa këtij sulmi, ka kërkuar që BE-ja të vendos sanksione ndaj Beogradit zyrtar.

Mirëpo, nga Unioni kanë thënë se janë duke i pritur hetimet përfundimtare për këtë çështje, dhe pastaj do të marrin vendim.

Nga ana tjetër, që nga qershori, Kosova është nën masa ndëshkuese nga BE-ja, kjo si pasojë e veprimeve të Qeverisë së Kosovës në Veri të vendit, ku ishin shkaktuar tensione, për të cilat përgjegjëse ishte bërë Prishtina zyrtare.