Bislimi: Kosova po përpiqet të zbardhë fatin e të zhdukurve, por ka mosgatishmëri nga Serbia

Zëvendëskryeministri i Kosovës, Besnik Bislimi gjatë një takimi me Këshillin Koordinues të Asociacioneve Familjare të të Zhdukurve, ku pjesëmarrës kanë qenë edhe drejtuesi i Komisionit Qeveritar për Persona të Zhdukur, Andin Hoti si dhe Kushtrim Gara, është theksuar se janë duke vazhduar përpjekjet në këtë drejtim, por që vazhdimisht ka mosgatishmëri nga Serbia për zbardhjen e të zhdukurve gjatë luftës në Kosovë, 1999-1998.

“Republika e Kosovës vijon në përpjekjet e saj të pareshtura institucionale në këtë drejtim, por i cili fatkeqësisht përballet me mosgatishmëri, mohim dhe hezitim nga autoritetet serbe për zbardhjen e tyre. Serbia, tashmë e njohur ndërkombëtarisht si shtet gjenocidal, duhet të përballet me të kaluarën dhe të mbahet përgjegjëse për gjenocidin në Kosovë”, thuhet në komunikatë për media.

E domosdoshme u vlerësua zbardhja e krimeve për të pagjeturit.

“Rëndësia e ndërkombëtarizimit edhe të gjenocidit të kryer nga Serbia në Kosovë, për të cilën organizatat mund të mbështeten plotësisht në përkrahjen e Qeverisë, si dhe u nënvizua domosdoshmëria për zbardhjen e krimeve, masakrave dhe planeve të strukturuara të saj për spastrimin etnik të shqiptarëve të Kosovës e vënia para drejtësisë e përgjegjësve të krimeve”.

Gjatë bisedës, është përshëndetur edhe miratimi i rezolutës në muajin maj në Asamblenë e Përgjithshme të Kombeve të Bashkuara për njohjen e gjenocidit serb në Srebrenicë dhe shënimin e 11 korrikut si “Dita Ndërkombëtare e Përkujtimit të Viktimave të Gjenocidit të Srebrenicës”.

“E njëjta dënon mohimin e gjenocidit dhe glorifikimin e kriminelëve të luftës”.

Grupi i përbashkët punues për personat e zhdukur është themeluar në vitin 2004, nën kujdesin e përfaqësuesit special për Kosovën të sekretarit të Përgjithshëm të Kombeve të Bashkuara (OKB).

Mirëpo, komisionet për persona të zhdukur të Qeverisë së Kosovës dhe të Serbisë kanë akuzuar më së shumti njëri-tjetrin gjatë viteve të fundit dhe nuk ka pasur bashkëpunim konkret në kuadër të grupit të përbashkët punues në terren.

Çështja e personave të zhdukur është ngritur edhe në kuadër të dialogut ndërmjet Kosovës dhe Serbisë në vitin 2020, por që nuk ka pasur ndonjë progres konkret.

Gjatë luftës në Kosovë në vitet 1998-1999 rreth 13 mijë njerëz nga të gjitha bashkësitë etnike u vranë, mbi 800 mijë u zhvendosën dhe rreth 1 mijë e 600 janë të zhdukur.

Qindra trupa të shqiptarëve të vrarë të Kosovës janë gjetur në varreza masive në Serbi.

Deri më tani nga Serbia në Kosovë janë kthyer rreth 1 mijë mbetje mortore.

Albanian Post, kishte realizuar edhe një video-story me familjarët e personave të zhdukur dhe vlerësimet që kanë për institucionet që janë angazhuar për të zbardhur fatin e tyre.

Zhduket Marrëveshja për të Pagjeturit e luftës – komisionet s’u takuan asnjëherë

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.