Kosova

Bislimi kërkon nga ministri hungarez të trajtohet aplikimi i Kosovës për t’u anëtarësuar në BE


Zëvendëskryeministri i Kosovës, Besnik Bislimi dhe ministri për Çështje të Bashkimit Evropian të Hungarisë, Janos Boka.

Zëvendëskryeministri i Kosovës, Besnik Bislimi, gjatë takimit me ministrin për Çështje të Bashkimit Evropian të Hungarisë, Janos Boka ka folur për situatën aktuale të Kosovës në rrugëtimin e saj drejt anëtarësimit në Bashkimin Evropian.

Kërkesa e tij drejtuar Boka-së, ishte që të mbështetej aplikimi i Kosovës, thuhet në komunikatën dërguar mediave nga Zyra e Kryeministrit.

“Nënvizoi aplikimin tonë për anëtarësim në dhjetorin e vitit 2022 dhe nevojën për trajtimin e këtij aplikimi me qëllim arritjen e hapave konkret tutje përmes marrjes së pyetësorit e më pas statusit të vendit kandidat, por edhe theksoi përkushtimin në zbatimin e agjendës së reformave evropiane dhe punën e cila po zhvillohet aktualisht në kuadër të Planit të Rritjes”, thuhet në komunikatë.

Tutje, Bislimi i uroi suksese Hungarisë në udhëheqjen e presidencës në Këshillin e BE-së.

“Duke i uruar suksese shtetit të Hungarisë në presidencën e tyre të ardhshme në Këshillin e BE-së, zëvendëskryeministri Bislimi shprehu gatishmërinë e plotë për bashkëpunim të ngushtë e produktiv”.

Edhe presidentja e Kosovës, Vjosa Osmani, në Samitin për Demokraci të Kopenhagës të martën, teksa ka folur për mbrojtjen dhe forcimin e demokracisë e po ashtu për rëndësinë e integrimit të Kosovës në Bashkimin Evropian, ka thënë se nga BE-ja s’janë duke pranuar asnjë rekomandim se çfarë duhet të bëjnë për t’u anëtarësuar në BE.

Sipas Osmanit, përmes kësaj qasje BE-ja është duke krijuar “një bllokadë”.

“Për kundër të gjithave, Bashkimi Evropian nuk i ka dhënë ndonjë mesazh popullit që ka ndonjë shpresë e po ashtu të na tregojë se çfarë të bëjmë. Pra, nuk po na tregon se çfarë duhet të bëjmë, përkundër kësaj ka një bllokadë, një mur – ndoshta për arsye puro politike, për çështje të brendshme politike të disa vendeve”.

Ajo ka shtuar se, “në anën tjetër kjo po rrezikon dhe paqen e po ashtu stabilitetin në Ballkanin Perëndimor”.

Teksa ka kërkuar nga NATO-ja dhe BE-ja që të bëjnë një politikë të dyerve të hapura ndaj Kosovës.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com


Lajmet kryesore