Bërxolli: “Teknika lind me prekjen dhe formën”

E gjeni veten në kërkim të produkteve sa më origjinale, autentike por edhe ekologjike, menjëherë të bie nderë mend për materialin e gjallë siç është druri.

Material i cili nuk dëmtojnë mjediset tona dhe mbi të gjitha janë të krijuara pa mbetje.

Druri në ambientet e brendshme, na sjellin gjithnjë e më pranë me ndikimin e ngrohtë të natyrës dhe e lënë jashtë zhurmën e qytetit.

Për këndin që ka në qendër idenë e afrisë me botën natyrore në çdo hapësirë personale, edhe elementi më i vogël i drurit krijon një kornizë perfektë.

Një histori druri, nga një artist që e takojmë në mes të zhurmës së kryeqytetit, me krijime të mbushura me ndjeshmëri.

Është fotograf në profesion, por me përkushtim dhe dëshira të orientuara në dizajn, Ervin Bërxolli.

Pasioni i tij është mishëruar në një seri ndriçuesish të veçantë të ndërtuar me dru të seleksionuar, të gjetur, të rimarrë apo të ricikluar, të cilët vijnë prej tij me një dizajn të paimitueshëm.

Në një intervistë për pikark, Bërxolli shprehet se dëshira ishte shumë e madhe për të punuar dhe se mungesa e pajisjeve i mungonin.

“Derisa ideja lindi me dritën e parë, ndriçuesin e parë e skicova dhe ndërtova me burimet e limituara që kisha, kështu zbulova si t’i kaloj në krahun tim. Punoja në tarracën time me mjete të vogla që me mundësonin të respektoja detajet e vetë pjesës së drurit që gjeja me shumë pak ndërhyrje në formë, për t’i dhënë asaj jetë serish”.

Ai thotë se zbulimi i vetvetes vjen pikërisht nga pushimet në Jalë, duke bërë varëse çelësash dhe llulla duhani.

“Nisa ta punoja drurin gjatë pushimeve të verës derisa kurioziteti nisi të më shtynte të kërkoja më tej, artistë dhe dizajner, krijues që përdornin këtë material në veprat e tyre”, thotë Bërxolli.

“Teknika për mua lind me prekjen me formën”.

Ai tregon se si ka filluar nga hiqi, duke thënë se ka mundur të pajiset me disa mjete të tjera që mundësojnë punë të sofistikuara.

“Teknika pra nuk është e përcaktuar, hiqen vetëm gjërat e tepërta, si të thuash pjesët e dëmtuara ose “të papastra” në konceptimin e imazhit të saj në dizajn, për të arritur tek esenca e pastër”

Bexolli, shprehet se materiali bazë të drurit e ka shumë të lehtë për ta gjetur, pasi që merret në natyrë dhe gdhendet.

“Ajo që ke në mend me atë që ti gjen përputhen shumë pak dhe thuajse gjithmonë forma e objektit që krijohet në fund ndryshon në mendjen tënde disa herë, derisa ti bie në dakortësi me formën finale”.

Po ashtu, ai shprehet se pavarësisht mendimit dhe imagjinatës, puna zbulohet duke e bërë, duke e zhvilluar.

“Shumë shpesh nuk e kontrollon dot, çdo ndërhyrje e tepërt i ndryshon kuptimin dhe origjinën, ndaj unë mundohem të mbaj lidhjen time fillestare, atë të të krijuarit duke e dëgjuar formën dhe lëvizjet e saj”, deklaron fotografi.

Bërxolli, ka thënë se do të dëshironte që të bashkëpunonte me ndonjë arkitekt, në mënyrë që të krijohet origjinalitet.

“Do ta dëshiroja, sidomos nëse krijimtaria do të arrinte sot të vendoste në hije pinterest-in dhe materialet e gatshme, për t’iu afruar sa më shumë idesë së dikurshme të asaj çfarë quhej dizajn”.

Ervin Bërxolli i lindur më 24 Dhjetor të vitit 1984, në qytetin e Tiranës.

Në vitin 2003, Bërxolli kreu Liceun Artistik “Jordan Misja” në Tiranë dhe në vitin 2007, u diplomua në Universitetin e Arteve në Tiranë për Pikturë Monumentale.

Karriera e tij nisi si një fotograf dhe dizajner tek “Jeta” Magazine në vitet 2004-2005, duke vijuar në Agjencinë e Shteteve të Bashkuara për zhvillimin e brendshëm (USAID) në vitet 2005-2006.

Në vitin 2007, ai u emërua si Drejtor Artistik dhe Fotografie në Agjencinë e Reklamave “Omega Studio”, ndërsa në vitet 2008-2009 në Revistën “Ti Sposi” në Tiranë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.