Bërnabiq për Kurtin: U befasova nga deklaratat e tij se dialogu është vetëm në vendin e gjashtë të prioriteteve

“Cilësia e jetës së gjithë qytetarëve në Kosovë dhe Metohi varet nga dialogu me Beogradin dhe për këtë arsye u befasova nga deklaratat e liderit të Vetëvendosjes, Albin Kurti, që tha se dialogu është vetëm në vendin e gjashtë apo shtatë në prioritetet e tij”, ka deklaruar kryeministrja e Serbisë, Ana Bërnabiq për televizionin serb “TV Happy”, raporton Tanjug.

Sipas Bërnabiq, “cilësia e jetës së qytetarëve në Kosovë varet nga dialogu mes Kosovës dhe Serbisë dhe për këtë arsye ajo është e befasuar që lideri i Vetëvendosjes, Albin Kurti, nuk e ka prioritet dialogun”.

Kryetari i Lëvizjes Vetëvendosje, Albin Kurti, gjatë fushatës parazgjedhore ka thënë se dialogu me Serbinë nuk është në mesin e tre prioriteteve të tij qeverisëse.

“Sipas të gjitha matjeve të opinionit dialogu me Serbinë nganjëherë janë prioriteti i gjashtë e ndonjëherë i shtati”.

“Kurrë s’janë tri të parat. Unë duhet t’i përgjigjem qytetarëve”, kishte deklaruar Kurti.

Në zgjedhjet e 14 shkurtit, Lëvizja Vetëvendosje mori mbi 47 për qind të votave, pa u numëruar ende votat me kusht dhe ato me postë. Kurti ishte kandidat i VV-së për kryeministër.