Ish-presidenti i ndjerë i klubit kuqezi AC Milan, Silvio Berlusconi njihej për protagonizmin e tij me deklarata jashtë fushës së gjelbërt por edhe me ndërhyrjet e tij jo të pakta në skemat e trajnerëve.
Por një deklaratë e tij në vitin 2007 për kanalin italian “La7″ ka shkaktuar jo pak bujë në media sociale.
Kohë e largët kur Berlusconi përshkruan me përpikëri të ardhmen e futbollit aktual.
“Unë shoh se Serie A po bëhet gjithnjë e më e varfër. Ne jemi liderë tani, por në 15 vjet do të jemi një supermarket. Premier League do të jetë liga numër një me të gjithë të tjerët pas tyre, pasi nuk kemi fonde”, tregonte ai në fillim të intervistës.
Parashikimi më i saktë i Berlusconi-t lidhet me rolin e arabëve në futboll me forcën e tyre ekonomike.
“Pastaj arabët do të vijnë në futboll dhe ne nuk kemi më asnjë joshje. Nuk ka infrastrukturë apo stadiume të reja. Jemi ende 30 vite prapa. A e dini se arabët po ndërtojnë qytete të tëra në shkretëtirë?”, shprehej para 16 vitesh ish-presidenti kuqezi.
Sipas tij, arabët kishin aq shumë forcë ekonomike në atë zonë, saqë ato definitivisht nuk do të ndaleshin.
“Ata patjetër do të hyjnë në botën e futbollit sepse është biznesi më i madh dhe jep më shumë shikueshmëri. Çfarë ofrojmë ne? Cila është joshja jonë? Në Angli ata janë duke nxitur fëmijët e vegjël të luajnë futboll dhe qeveria po siguron fonde për akademitë e futbollit”, shtoi Berlusconi asokohe.
E këtu ai duket se ndjen diçka profetike në intervistën e tij të vitit 2007 për kanalin “La7”.
“Kur flas për këto gjëra, njerëzit mendojnë se jam i çmendur. Unë shikoj nga e ardhmja dhe jam i sinqertë me ju. E shoh të ardhmen e futbollit italian si shumë të zymtë”.
Italia, katër herë kampione e botës, nuk arriti të kualifikohej në Botërorin e Qatar-it, duke shënjuar për herë të dytë radhazi mungesën e tyre në këtë turne.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
