Berishaj lavdërohet me punën e tij si ambasador në Kroaci

Zëvendësministri i Mbrojtjes, Shemsi Syla, gjatë vizitës së tij në Kroaci është takuar me ambasadorin Martin Berishaj, i cili nga Prokuroria Themelore akuzohet për deklarim të rrejshëm të pasurisë dhe nga Prokuroria Speciale për shpëlarje parash, pas takimit është thënë se Berishaj e ka njoftuar për punën “e dobishme” dhe “gjithë stafit të tij”.

“Ata bashkërisht zhvilluan takim me Unionin e Shqiptarëve në Republikën e Kroacisë, të cilët japin një kontribut të çmuar në shtetin ku jetojnë dhe përherë mbajnë lidhjet e tyre të shumta me atdhe”, thuhet në njoftim.

Në këtë takim, është thënë se zëvendësministri Syla i njoftoi mbi të arriturat e Ministrisë së Mbrojtjes gjatë viteve të fundit.

Më 29 mars, Berishaj është intervistuar nga Prokuroria Speciale e Kosovës për tri vepra “shpërlarje e parave”, “shmangie nga tatimi’”, “mosraportimi ose raportimi i rremë, i të ardhurave, i dhuratave, i dobisë tjetër materiale ose i detyrimeve financiare”.

Rasti i Martin Berishaj

Vitin e kaluar mediat sllovene raportuan për një skandal të madh financiar ku ishte i përfshirë edhe ambasadori Berishaj.

Në artikullin e TV Planet thuhej se Martin Berishaj kishte kompani në Mal të Zi me emrin MB Consulting dhe paguhej si konsulent nga kompania e energjisë elektrike GEN-I dega në Beograd.

Më vonë, do pranohej nga vetë Berishaj se është e vërtetë që ka kompani me këtë emër dhe gjithashtu është e vërtetë se u pagua nga GEN-I dega në Beograd.

Berishaj veç marrjes së parave dhe kompanisë në Mal të Zi, ai po dyshohet se një pjesë të parave të marra në Beograd nga GEN-I i ka sjellur edhe në Kosovë.

Ato para të Berishajt dyshohet se financuan fushatat e Lëvizjes Vetëvendosje dhe Listës Guxo.

Në anën tjetër, në Kosovë Berishaj akuzohet nga Prokuroria Themelore për “mos-deklarim të pasurisë apo deklarim të rrejshëm të pasurisë” dhe nga Prokuroria Speciale për “shpëlarje parash”.

Ekziston po ashtu edhe një kallëzim penal për Berishajn i cili dyshohet se ka bërë evazion fiskal dhe nuk ka paguar taksa.

Përkundër këtij skandali me përmasa rajonale, Berishaj ka mbetur i paprekur në pozitën e tij.

Deri më tani, Presidentja Vjosa Osmani, kryeministri Albin Kurti dhe ministrja e Punëve të Jashtme të Kosovës, Donika Gërvalla, i janë vënë në mbrojtje Berishajt dhe thonë se s’kanë arsye ta shkarkojnë.

Ai vazhdon të jetë përfaqësuesi i Kosovës në shtetin mik të Kroacisë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.