Berisha vlerëson figurën e Bregut, zgjedhja e Presidentit “farsë”

“Më pyet për Partinë Demokratike, mos më pyet për farsën elektorale presidenciale”.

Kjo do të ishte deklarata e kreut të sapozgjedhur të PD-së, Sali Berisha, përpara gazetarëve, i pyetur se çfarë mendon për Majlinda Bregun si kandidate për Presidente të Republikës së Shqipërisë.

Berisha vlerësoi figurën e Bregut, një ish-ministre dhe deputete e PD-së.

“Ajo është figurë e respektuar e PD-së. Tani është në fushën e politikës dhe diplomacisë”, u shpreh Berisha.

Kujtojmë që të shtunën e 4 qershorit do të zhvillohet raundi i katërt i votimeve për zgjedhjen e Presidentit.

Partia Socialiste, pasditen e kësaj dite, do të mbledhë Kryesinë për të propozuar dhe zgjedhur një emër, i cili do të dorëzohet pranë Kuvendit të Shqipërisë.

Më herët Berisha ka deklaruar se do të marrë pjesë në seancën plenare të së shtunës, por do të votojë kundër kandidatit të mazhorancës.

Ndërsa kryetari i Grupit Parlamentar të PD-së, Enkelejd Alibeaj, në një deklaratë për mediat, tha se ata nuk do të marrin pjesë në Kuvend. Duke bojkotuar kështu seancën.

Sakaq, kreu i Grupit socialist, Taulant Balla, në replika nga larg iu drejtua Alibeajt që bojkoti nuk është zgjidhje.

Sipas tij, bojkoti nuk sjell kurrë ndonjë përfitim.

“Ai është thjesht fyerje dhe shpërfillje e delegimit të sovranitetit të zgjedhësve”, u shpreh Balla.

Një ditë më parë, Balla ka deklaruar se mazhoranca do të paraqitet me një kandidat të vetëm në Parlament.

Sa i përket Majlinda Bregut, Balla ka shprehur keqardhjen që opozita nuk e propozoi si emër.

Ai ka theksuar se, nëse emri i saj do vinte si propozim, ai do ta kishte votuar.

Çfarë ka ndodhur?

Kujtojmë që tre raundet e votimeve për një President konsensual “dështuan”.

Mazhorancë-opozitë kishin arritur në një marrëveshje që përgjatë tri raundeve të para – siç e parashikon dhe Kushtetuta që Presidenti zgjidhet me 84 vota – do të ishte kjo e fundit që do të propozonte emra. Ndërsa mazhoranca pas raundit të katërt.

Tanimë mazhoranca, pas ndryshimeve kushtetuese, ka të drejtën ta propozojë dhe ta zgjedhë e vetme Presidentin me një shumicë të thjeshtë votash, 71.

Procesi për zgjedhjen e Presidentit kalon në pesë raunde, sipas Kushtetutës.

Presidenca e shtatë në Shqipëri do të përmbyllet më 24 korrik të vitit 2022.

Në krye të shtetit, që prej 2017-ës, është Ilir Meta.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.