Berisha replikë Kim-it: Mandati im është i qytetarëve, nuk e dorëzoj

Ish-lideri historik i Partisë Demokratike, Sali Berisha, nga takimi në “foltoren” e Fierit i është kundërpërgjigjur deklaratës së ambasadores amerikane në Tiranë, Yuri Kim.

“Të gjitha t’i marrin mandatin nuk e dorëzoj. Nuk është i imi, është i qytetarëve shqiptarë”, u shpreh ai nga takimi me anëtarët e PD-së në Fier, duke e bërë të qartë se nuk do ta dorëzojë mandatin e deputetit.

Yuri Kim, më herët, në një takim me kryetarin e PD-së, Lulzim Basha, i pat kërkuar këtij të fundit që të distancohet nga Berisha.

“Do të ishte një ironi historike dhe tragjike, nëse Partia Demokratike do të hante bar për hatër të një deputeti të saj”, deklaroi ajo.

Basha më pas e përjashtoi ish-kryeministrin nga grupi parlamentar i PD-së.

Ndër të tjera, Berisha tha se nuk i ka pranuar kushtet e ambasadores për t’u larguar nga Kuvendi i Shqipërisë.

Yuri Kim, gjatë një interviste, u shpreh se “kush thotë se është habitur nga vendimi i Departamentit Amerikan të Shtetit (DASH) për zotin Berisha, me gjasë nuk është shumë i sinqertë”.

Sali Berisha bashkë me familjen e tij u shpallën persona non-grata në SHBA. Ka qenë sekretari Amerikan i Shtetit, Antony Blinken, që bëri me dije vendimin e DASH.

Bazuar në këtë vendim, kreu i selisë blu e përjashtoi liderin historik të PD-së.

I menjëhershëm ishte reagimi nga ana e ish-kryeministrit. Prerazi ai tha se nuk largohej nga statusi i deputetit, por shkeljen e statutit nga Basha do ta kthente në takime me të gjithë anëtarët e PD-së, qytet më qytet.

Kështu, më 16 shtator, Berisha nuk ishte i vetëm. Atij iu bashkuan kontribuues të vjetër të PD-së në “betejën e tij”.

Ai ka nisur turin e takimeve në Tiranë – nga ku do të shpërndahet më pas në të gjithë vendin me bazën e mbështetësve të kauzës së tij.

Ish-lideri i PD-së e ka ravijëzuar lëvizjen e tij për një PD “më të fortë, demokratike dhe më të bashkuar”.

Nga qyteti i Fierit ai deklaroi se “PD-ja duhet të ringrihet më e fortë se kurrë, ashtu si në vitin 1991”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.