Berisha mbyll protestën – Paralajmëron tjetrën

“Sot ne do të shpërndahemi. Do të kujdesemi për të plagosurit. Shumë shpejt do të njoftojmë beteja të tjera”.

Me këto tre fjali, ish-kreu i Partisë Demokratike, Sali Berisha, ka mbyllur zyrtarisht protestën kundrejt kreut aktual të bluve, Lulzim Basha, pasi nuk arriti ta nxirrte këtë të fundit nga selia e demokratëve, pavarësisht akteve vandale ndaj godinës.

“Do të kujdesemi për vëllezërit dhe motrat tona të arrestuara sepse janë vërsulur si bisha për të mbushur komisariatet”, vijoi Berisha. “Do të njoftojmë shumë shpejt beteja të tjera, që nuk do të ndalen deri në fitoren tonë të plotë”.

Sakaq, ai ftoi demokratët të bashkohen në betejën e radhës. Ato, do të vijojnë deri në realizimin e plotë të qëllimeve, pra largimin e Bashës.

“Kemi përballë një narko-shtet dhe diktaturë të vërtetë. Kjo betejë dëshmoi se sa jetike është beteja jonë për ta bërë Shqipërinë me një opozitë të vërtetë. Do ta vazhdojmë në forma edhe më të fuqishme sesa kjo e sotmja”, përmbylli ai.

Me largimin nga PD-ja, Berisha marshoi edhe për nga godina e Kryeministrisë, ku u ndal për një fjalë tjetër.

Dhunë…sërish

“Kjo që patë sot, është vetëm shfaqja e parë e saj”.

Ish-kryeministri dhe ish-kreu i Partisë Demokratike, Sali Berisha, pasi u largua nga selia e Partisë Demokratike me marrjen e situatës nën kontroll nga Policia e Shtetit, ka marshuar me disa mbështetës të tij drejt bulevardit “Dëshmorët e Kombit”, ku është ndalur ekzaktësisht përpara Kryeministrisë e duke paralajmëruar se kjo ngjarje nuk do të jetë e fundit.

Sipas Berishës, opozita e vërtetë, është ajo që gjendet me të, në shesh.

“Jemi dhe do të mbetemi të pamposhtur në vlerat që besojmë”, tha ish-lideri demokrat.

Ndërsa, reagimin nga selia blu, e cilësoi si një skenar të përgatitur me kujdes gjatë këtyre ditëve nga Lulzim Basha.

“Nuk kishte njeri dhe nuk ka asnjë problem me asnjë deputet të PD-së, përveçse me Lulzim Bashën”, vijoi Berisha. “Kjo është një lëvizje e pandalshme. Është një betejë, e cila nuk do të ketë të sosur. Kjo që patë sot, është vetëm shfaqja e parë e saj”.

Një mesazh i Berishës, ka shkuar edhe ndaj kryeministrit Edi Rama.

“Kush mendon se do mbajë pengje dhe kukulla për të shtypur vullnetin e tyre, gabohen rëndë. Populli i referendumit dhe lirisë. Janë qytetarët, të cilët rikthyen në PD votën e lirë”.

Ndërsa, mbi thirrjen e protestave të tjera, ai nuk përcaktoi një datë të saktë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.