Berisha mbërrin në selinë e PD: Referendumi akt madhështor i pluralizmit politik, shkarkoi Bashën në mënyrë plebishitare

Ish-kryeministri dhe ish-kryetar i Partisë Demokratike, Sali Berisha, ka deklaruar nga selia blu – gjatë kohës kur Lulzim Basha po mban një mbledhje me Kryesinë – se referendumi i zhvilluar për ratifikimin e shkarkimit të Bashës jo vetëm ishte një akt madhështor i pluralizmit politik por një votim plebishitar për shkarkimin e kryedemokratit.

Sipas Berishës, kanë qenë 44 mijë anëtarë të PD-së, ata të cilët morën pjesë në referendum.

Sipas tij, ky është ndëshkimi më i merituar për një person si Basha, të cilin e përshkroi si “të padenjë për detyrën që ka mbajtur”.

Berisha ka vijuar edhe akuzat ndaj Bashës, duke thënë se ai karrigen, e ka shfrytëzuar për pazaret e veta personale.

“Këtë revolucion nuk ka forcë ta ndalë”, tha ish-kryeministri. “Ka pasur përpjekje të turpshme të narkoshtetit kundër këtij akti madhor në historinë e pluralizmit”.

Megjithatë, ai e cilësoi këtë, si referendumin e parë të thirrur në histori nga një forcë politike shqiptare, duke e përmbledhur si të suksesshëm.

Për të dhënë mesazhin e tij, Berisha ka zgjedhur oborrin e PD-së, ku ka dhe një numër mbështetësish të tij. Në zyrat e selisë sakaq, Basha po e vijon mbledhjen e kryesisë.

Ky i fundit, ka dhënë edhe mesazhet kryesore, ku shprehet edhe fillimi i punës së strukturave për përgatitjen për zgjedhje.

Anëtarja e Komisionit të Rithemelimit, Albana Vokshi, ka lexuar ndërkohë rezultatet zë më zë të referendumit.

Në përfundim, në tërësi, për shkarkimin e Bashës, kanë qenë sipas saj 43 mijë e 385 anëtarë.

Me anë të këtyre shifrave, Berisha pretendon nga ana tjetër se Basha e ka marrë ndëshkimin nga anëtarësia e PD-së.

Një ftesë ka shkuar sakaq për deputetët demokratë. Ish-kryeministri, i ka kërkuar atyre të shkojnë të verifikojnë procesverbalet e votimit.

Ndërsa, mbi lëvizjen e radhës, ai tha se do të jetë ajo e protestës kombëtare. Berisha ka thirrur një të tillë të hënën e 20 dhjetorit, kundër nismës rajonale “Open Balkan”.

Pikërisht në këtë datë, do të zhvillohet në Tiranë një takim, ku prezent do të jetë edhe Presidenti i Serbisë, Alexander Vuçiç.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.