Berisha: Ju kërkoj falje që mbështeta Bashën, Kuvendi mblidhet më 11 dhjetor

Lezha ka qenë foltorja e radhës e ish-kryetarit të Partisë Demokratike, Sali Berisha, nga ku ai u ka kërkuar falje demokratëve, për faktin se ka mbështetur kryesimin e partisë nga Lulzim Basha dhe ka pretenduar se në dosjen amerikane ndaj tij, nuk ka asnjë provë të vlefshme mbi akuzat e ngritura nga Departamenti i Shtetit.

Ndër të tjera, ai bëri me dije se ka ndër mend që Kuvendin Kombëtar ta thërrasë më 11 dhjetor. Qëllimi do të jetë rrëzimi i vendimit të Bashës mbi përjashtimin e tij nga Grupi Parlamentar dhe mbajtja e zgjedhjeve të reja në PD.

Deputeti demokrat Flamur Noka, i cili është mbështetës i kauzës së Berishës, ka qenë i pranishëm në takim, pas mungesës në foltoren e Beratit. Po ashtu, edhe ish-deputeti Klevis Balliu dhe Aldo Bumçi.

Kreu historik i bluve vijoi diskursin e tij, duke alternuar akuzat ndaj Bashës dhe kryeministrit Edi Rama.

Sipas tij, arsyeja se pse Rama është në këtë mandat të tretë, është pikërisht kryedemokrati aktual.

“Të gjithë kemi qenë mbështetës të Lulzim Bashës. Asnjë hile nuk i kemi bërë dhe ai i hoqi njerëzit nga lista”, tha Berisha nga foltorja. “Ky njeri na ka udhëhequr nga humbja në humbje. Katër njëra pas tjetrës. Të tillë humbës nuk ka”.

Më tej, kryeministri ka thënë se “shqiptarët nuk i kanë pranuar barin Enver Hoxhës, e jo më gënjeshtrat e Bashës”.

Ndërsa, nëse vendimi mbi të do të ishte marrë nga Këshilli Kombëtar, ai pretendon se do e kishte pranuar përjashtimin edhe nga partia.

Çështja me Departamentin Amerikan të Shtetit ka qenë në vëmendjen e Berishës muajt e fundit. Ai e rikonfirmoi faktin se Gjykata e Parisit ia ka pranuar ankimimin dhe gjithçka pret janë provat nga Blinken.

Por, nga DASH apo Ambasada Amerikane në Tiranë nuk ka asnjë koment mbi çështjen Berisha.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.