Deputeti i Aleancës për Ardhmërinë e Kosovës, njëherësh kryetar i Komisionit Parlamentar për Siguri, Bekë Berisha, e ka akuzuar për nepotizëm ministrin e Punëve të Brendshëm të Kosovës, Xhelal Sveçlën.
Ai konsideron se Policia e Kosovës po shkon drejt partizimit dhe jo profesionalizimit.
Këto deklarata Berisha i ka bërë në seancën e të mërkurës në Kuvendin e Kosovës.
Gjatë diskutimit për siguri, Berisha ka thënë se edhe policia ka filluar që të politizohet.
“Nëse e keni pasur gojën plotë në luftën ndaj nepotizmit dhe kapjes së shtetit, ajo çka dua të them është se askush nuk mund të gradohet në polici, nëse nuk është i afërm i juaji dhe nuk është në funksion të plotë të politikës suaj. Policia po fillon të politizohet dhe jo profesionalizohet. Nëse kemi folur për kapje, në fakt kuptimin e plotë të fjalës kapje po e bëni tani. Andaj duart larg nga policia”, ka deklaruar Berisha.
Ndërsa, ka thënë se institucioni i Forcës së Sigurisë së Kosovës duhet të jetë prioritet mbi prioritete për ekzekutivin.
“Ky institucion të shihet si prioritet mbi prioritete për shkak se pa siguri nuk ka zhvillim ekonomik, s’ka funksionim të asnjë institucioni dhe nuk ka shtet. Kurrë nuk duhet të harrojmë që ushtria e Kosovës përveç që e kemi amanet e cila themelet i ka në gjakun e heronjve tonë, po ashtu është ushtri që synon ti bashkohet ushtrive moderne të aleancës së NATO-s”.
Sipas Berishës, “sjellja në Kuvend e strategjisë së sigurisë kombëtare të Kosovës është prioritet mbi prioritetet. Njëkohësisht sigurimi i kushteve dhe armatimi i kësaj ushtrie me mjete moderne”.
Kuvendi i Kosovës në seancën plenare të 19 majit ka miratuar tri projektligje, ku dy prej tyre për Forcën e Sigurisë së Kosovës dhe një për Projektligjin për Turizëm.
Projektligji për Policinë ushtarake të FSK-së ka marrë votat e 74 deputetëve, kurse me 68 vota për u miratua në parim Projektligji për Komisionerin Parlamentar për Forcën e Sigurisë së Kosovës.
Ndërsa, anëtari i Komisionit për Siguri, Enver Dugolli i është përgjigjur kritikave të deputetit nga radhët e AAK-së, Bekë Berisha, pasi sipas tij ai i ka përzier temat.
“Deputeti Berisha sikurse i përziu temat për shkak se tema për të cilën është thirre është pas agresionit rus mbi Ukrainën dhe situata e sigurisë karshi kësaj situate prandaj edhe fjalimi im do të jetë në këtë temë dhe nuk do të lëshohem në TRUST pensional e pagë minimale sepse nuk është temë e debatit të sotshëm”, deklaroi deputeti pozitar.
Ai theksoi se institucionet e Kosovës kanë shtuar komunikimin me aleatët në drejtim të rritjes së kapaciteteve mbrojtëse dhe reaguese.
“Republika e Kosovës ka rritur shkallën e vigjilencës, sigurisë dhe mbrojtjes dhe ka shtuar komunikimin me aleatët në drejtim të rritjes së kapaciteteve mbrojtjes dhe reaguese. Pjesëmarrja e Kosovës në operacionet ‘Defender Europe 21’ me një kontingjent të forcave prej 330 pjesëtarëve dhe të ardhmen ‘Defender Europe 23’ me një kontingjent të forcave prej 1000 pjesëtarëve dëshmon përkushtimin tonë për rrugën euroatlantike dhe miqësisë me ShBA, BE dhe NATO-në”, tha ai.
Ndër të tjera, përmendi edhe armatimin e Serbisë.
“Serbia nuk po armatoset për të luftuar me Rusinë dhe as me Kinën sepse ka miqësi të dëshmuar me ta, por po armatoset kundër fqinjëve të saj, me theks të veçantë kundër Kosovës të cilën nuk e njeh”.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
