Berisha-Bashës: I shkarkuar dhe thërret Këshillin Kombëtar

Një ditë pas “rithemelimit” të Kuvendit të 11 dhjetorit, i cili u thirr nga ish-lideri demokrat, Sali Berisha, ky i fundit po zhvillon një takim virtual me simpatizantë nga Florida e Shteteve të Bashkuara për të vijuar me atë që e quan si “reformim të Partisë Demokratike”.

Berisha iu adresua “deputetit Basha”, duke i kujtuar se ky i fundit është shkarkuar dhe Këshilli Kombëtar është një mashtrim publik.

Sipas tij, në mbledhjen e 12 dhjetorit ka pasur përfshirje të individëve të tjerë pasi kryedemokrati Lulzim Basha nuk ka grumbullar as 1/3-ën e anëtarëve.

Duke iu kthyer Kuvendit të 11 dhjetorit, ai e quajti “të jashtëzakonshëm, pasi u thirr nga anëtarësia meqënëse kryesia nuk pranonte të mblidhte kuvendin”.

Për ish-kryeministrin, qasja konservatore që gjendet në themel të krijimit të PD-së, është zëvendësuar me ideologjinë e majtë.

Në vijim të akuzave ndaj ambasadores së SHBA-ve në Tiranë, Yuri Kim, ai e konsideroi këtë të fundit si kataliste të gjendjes së krijuar në opozitën shqiptare.

Berisha kujtoi njoftimin e shpalljes non-grata nga Departamenti Amerikan gjatë muajit maj, duke sjellë në vëmendje kundërpërgjigjen ndaj sekretarit amerikan, Antony Blinken.

Ish-lideri demokrat bëri më pas një ravijëzim të përfshirjes, sipas tij, të George Soros në rangjet qeverisëse pranë reformave të Shqipërisë.

Ai i cilësoi si katastrofale këto të fundit, me përfshirjen e figurave të inkriminuara në korrupsion apo që datojnë nga periudha komuniste.

“Ne e konsideronim vetting-un si tejet të rëndësishëm, por u aplikua nga lart-poshtë dhe jo anasjelltas”, theksoi Berisha.

Më tej, ai kujtoi se nuk ka asnjë funksionar që të jetë shpallur non-grata, tetë vite pas është larguar nga funksionet e larta të politikës.

“Tre javë pas humbjes së zgjedhjeve, PD-ja u projektua si aleate e Partisë Socialiste”, zbuloi ish-lideri demokrat gjatë fjalës së tij.

Beteja deklarative

Berisha shprehu më herët gatishmërinë “për të vazhduar betejën kundër të keqes që ka mbërthyer Shqipërinë”.

“Ju pres te gjithëve ne shtëpinë e kontributeve, sakrificave dhe idealeve tone te përbashkëta, Partine Demokratike”, shkruante ai, përmes një postimi në median sociale Facebook.

Kjo deklaratë erdhi si kundërpërgjigje ndaj lidershipit zyrtar të PD-së, Lulzim Basha, mbrëmjen e 11 dhjetorit, i cili njoftoi për mbjedhjen e Këshillit Kombëtar demokrat.

Berisha tha se “shume prej jush kane dyshuar, ndoshta edhe janë trembur për shkak të fushatës së fuqishme linçuese që është mbajtur kundër personit tim dhe lëvizjes së Foltores”.

Gjithashtu, Berisha e cilësoi si “kohë e veprimit” atë të sotmen, dhe “jo të dyshimit”.

Në përmbyllje, ai ka falënderuar të gjithë pjesëmarrësit në Kuvendin Kombëtar të PD-së.

Kuvendi i Sali Berishës e shkarkoi nga detyra me 4 mijë e 446 vota, kryetarin e Partisë Demokratike, Lulzim Basha, me vendimin për të pasur një referendum anëtarësia mbi rrëzimin e plotë të tij nga lidershipi demokrat.

Vetë kryetari Basha, jo vetëm që nuk i pranoi dhe nuk i njohu vendimet e Kuvendit berishian, por ai siguroi se demokratët, do të lënë pas pjesët e hidhura të së shkuarës së partisë. Këtu, ai përfshiu edhe ata, të cilët i cilësoi si “mbeturina të komunizmit dhe të korrupsionit”.