Lajme

Bender e Rohac flasin për Albanian Post: Çfarë do të ndodhë pas takimeve të Scholz me Kurtin e Vuçiç-in?


Fotografia e punuar nga gazetari i Albanian Post, Xhezair Dashi

Sipas studiuesve të politikave të Ballkanit Perëndimor, takimet e ndara në mes të kancelarit gjerman, Olaf Scholz dhe liderëve shtetërorë të Kosovës dhe Serbisë, nuk pritet se do të prodhojnë diçka të re.

Por, mbi të gjitha ky angazhim i Scholz, është një sinjal i mirë pasi që shteti gjerman sipas tyre, po dëshiron të marrë një rol më dëshmues në Ballkanin Perëndimor, pas neglizhencës dhe auto-pilotimit që ka ngjarë të jetë politika kryesore e Bashkimit Evropian, tash e sa vite në raport me Gadishullin.

Për Dalibor Rohac, një studiues i politikave të BE-së në Institutin Amerikan të Ndërmarrjeve (AEI), çelësi në këtë takim duhet të jetë ushtrimi i presionit mbi Serbinë.

“Serbia po luan një rol të pasinqertë me dy fytyra – duke kërkuar anëtarësimin në BE me njërën anë dhe duke shërbyer si kolona e pestë e Rusisë, si një burim jostabiliteti në rajon në anën tjetër. Pyetja është nëse kjo është pjesë e një përpjeke të re, më serioze nga ana e Gjermanisë, apo është një gjë që ka për të ngjarë vetëm një herë”, ka thënë Rohac për Albanian Post.

Dalibor Rohac

Në anën tjetër, për hulumtuesin e lartë dhe zëvendëskryetarin e organizatës jo-qeveritare, European Stability Initiative, Kristof Bender, takimet e ndara në mes të Scholz-Kurti-Vuçiç, nuk do të sjellin ndonjë përparim të madh në dialog.

Megjithatë, sipas tij Kurti takimin me Scholz duhet ta përdorë si një mundësi të mirë në atë mënyrë që të shtyjë përpara interesat e rëndësishme të Kosovës në arenën ndërkombëtare.

“Kurti në takim me Scholz duhet të shtyjë përpara interesat e rëndësishme të Kosovës, siç është anëtarësimi i Kosovës në Këshillin e Evropës, liberalizimin e vizave, gjetjen e një rruge për një proces më të besueshëm të anëtarësimit në BE, duke i bërë thirrje BE-së që t’u ofrojë të gjitha vendeve të Ballkanit Perëndimor anëtarësimin në tregun e vetëm të BE-së, si një masë të përkohshme derisa e gjitha rajoni bëhet pjesë permanente e unionit”, ka shtjelluar Bender për Albanian Post.

Sipas Bender, takimi i katër majit në Berlin do të jap një mesazh të qartë – Berlini është i interesuar në ringjalljen e procesit të pranimit të Ballkanit Perëndimor në BE.

“Qeveria e re në Berlin ka një përkushtim më të fortë në raport me Ballkanin Perëndimor. Pas aplikimit të Ukrainës në BE Scholz tha se Ballkani Perëndimor nuk duhet të harrohet dhe se gabimet e së kaluarës nga BE-ja duhet të korrigjohen, takimi në fjalë mund të përcjellë këtë mesazh te të dy liderët”, ka shtuar ai.

Kristof Bender

Ndryshe, më 29 prill, zyra për media e qeverisë gjermane për Albanian Post e pati konfirmuar se Kancelari gjerman, Olaf Scholz do të presë në takim Kryeministrin e Kosovës, Albin Kurti, Presidentin e Serbisë, Aleksandër Vuçiç, dhe ndërmjetësin evropian për dialogun Kosovë-Serbi, Miroslav Lajçak në Berlin, me të cilët do të diskutojnë zhvillimin e mëtejm të dialogut.

Pas takimeve, në mbrëmje, zyra për media e qeverisë gjermani, pati bërë të ditur se do të edhe një takim jo-formal ku Lajçak do të bisedojë me Kurtin dhe Vuçiç-in në lidhje me dialogun.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com


Lajmet kryesore