Komuna e Deçanit nderoi presidentin e Shqipërisë, Bajram Begaj, duke i dedikuar titullin “Qytetar nderi i Deçanit”, ndërsa kryetari i Aleancës për Ardhmërinë e Kosovës (AAK), Ramush Haradinaj, nëpërmjet një postimi në “Facebook” të dielën, theksoi se është i nderuar nga vizita e Begajt në kompleksin memorial “Dëshmorët e Kombit” në Gllogjan.

“Gjaku s’bëhet ujë, së bashku me Presidentin e Shqipërisë nderuam të rënët për liri në kompleksin memorial ‘Dëshmorët e Kombit’ në Gllogjan. Lavdi të rënëve për liri! Faleminderit President Begaj!”, shkroi Haradinaj.

Pas pranimit të dekoratës, presidenti shqiptar falënderoi komunën e Deçanit, duke shtuar se vendi i Kosovës dhe Shqipërisë është në Evropë: “Mbresat dhe emocionet e kësaj dite janë të jashtëzakonshme. Shumë faleminderit për mikpritjen. Kam ardhur te Bjeshkët e Nemuna, vendin e bekuar nga Zoti”.

“Jam në një trevë ku kam gjetur burra e trima patriotë, njerëz të besës e të fjalës. Fati na ka dërguar në rrugë të ndryshme, por përcaktimi është i njëjtë, të gjithë bashkë do të jemi në Evropë, me një Kosovë të lirë e të pavarur. Nga sot jam shumë i nderuar që të jem ‘Qytetar Nderi’ i kësaj komune”.

Kosova sivjet shënoi 26-vjetorin e betejës çlirimtare të familjes Haradinaj në Gllogjan dhe 25-vjetorin e sulmeve ajrore të NATO-s kundër caqeve ushtarake e policore të ish-Republikës Federale të Jugosllavisë (RFJ).

Për të nderuar luftëtarët e Ushtrisë Çlirimtare të Kosovës (UÇK), që ranë dëshmorë në përballje me forcat serbe, presidenti shqiptar gjatë vizitës dy ditore në Kosovë pritet të bëjë homazhe edhe në Junik dhe Drenas.