Begaj pranon se mandatet e ambasadorëve shqiptarë jashtë janë tejzgjatur

Presidenti i Republikës, Bajram Begaj, ka pohuar se qëndrimi i ambasadorëve shqiptarë në selitë e huaja diplomatike, është zgjatur përtej kohës që parashikon ligji i Shërbimit të Jashtëm në Republikën e Shqipërisë.

Por, megjithatë, pavarësisht kësaj, do të duhen edhe deri në gjashtë muaj të tjerë, për t’i zëvendësuar ata.

Kështu ka thënë ai, i ftuar në emisionin “Pa Censurë” në RTSH, ku ka folur edhe për aspekte të tjera, si emërimi i kreut të ri të Shërbimit Informativ Shtetëror apo delimitimin detar me Greqinë, çështje kjo, e cila do të shkojë në gjykatën e Hague-ës.

Lidhur me ambasadorët, Begaj shtjellon se procedurat ligjore do të ndiqen rreptësishtë në këtë proces.

Po ashtu, se është në konsultime të vijueshme me kryeministrin e vendit, Edi Rama, lidhur me emrat e mundshëm, të cilët mund të zëvendësojnë ambasadorët aktualë.

Kanë zënë pluhur nëpër botë, ambasadorët shqiptarë

I njëjti proces ndërkaq ndjek edhe për kreun e ri të SHISH, ku pavarësisht se ka pasur bisedime për zëvendësuesin e Helidon Bendos në këtë post, një emër konkret në tryezën e Begajt, ende nuk ka.

“Nuk kam një emër konkret në tavolinë. Përzgjedhja e emrit do të bëhet në bazë të meritave individuale, kapaciteteve profesionale dhe integritetit njerëzor. Jemi në proces”, shtoi më tej kreu i shtetit.

Presidenti liron nga detyra drejtorin e SHISH-it, Helidon Bendo

Sa i përket delimitimit detar me Greqinë, mbi çdo kërkesë që do të vijë nga Ministria për Evropën dhe Punët e Jashtme në tryezën e Begajt, ai ka premtuar se do të shprehet lidhur me çështjen konform kërkesës, duke zbatuar Kushtetutën.

Por, sërish, edhe mbi këtë aspekt, ende nuk ka një dokument shkresor të dërguar në zyrën e tij, por vetëm informacione, lidhur me konsultimet diplomatike.

Ndërsa, përcaktimin e zonave ekonomike ekskluzive, në mbyllje, e cilësoi si një teknikalitet, për t’u përcaktuar nga ekspertët dhe grupet teknike, të cilat do të ngrihen për çështjen në fjalë.

Deti “rishkumëzon” politikën në Shqipëri – Nga marrëveshja e vitit 2009, tek rrëzimi në Kushtetuese e çështja në Hague, si shtjellohet ajo?

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.