Befason Sterling, i hapur për largimin nga Manchester City

Futbollisti anglez, Raheem Sterling, ka befasuar me një deklaratë për mediat angleze, teksa ka thënë se është i hapur për një largim nga klubi i tij, Manchester City.

“Nëse më vjen ndonjë ofertë nga klubet tjera ku mund të kem më shumë minuta në fushë, atëherë do të isha i hapur. Futbolli është gjëja që dashuroj më së shumti, andaj dua të kem më shumë minuta në fushë”, tha Sterling.

Sulmuesi anësor, me ardhjen e Jack Grealish në Manchester City, po ka më pak hapësira në formacionin e Pep Guardiola-s.

Ai ishte ndër lojtarët kryesorë në City, por në këtë sezon, Sterling numëron vetëm katër takime nga minuta e parë dhe ka shënuar vetëm një gol.

Guardiola e ka vendosur në rolin e sulmuesit anësor, pas sulmuesit kryesor, por anglezi dëshiron të jetë pikë referimi në fazën e avancuar në një klub tjetër.

Për ta bërë më të kuptueshme që dëshiron të largohet, ai tha se do të provonte edhe një aventurë tjetër veç futbollit anglez.

“Si lojtar anglez gjithçka që di është Premier League dhe unë gjithmonë kam pasur diçka të dobët, që ndoshta një ditë do të më pëlqente të luaja jashtë vendit për të parë sesi do të përballoja sfida të reja”, shtoi sulmuesi anglez.

Kujtojmë që Sterling u transferua nga Liverpool-i në Manchester City gjatë verës së vitit 2015, për shumën e 64 milionë eurove.

Gjatë kësaj periudhe në Manchester, 26-vjeçari me prejardhje nga Xhamajka ka luajtur në 302 ndeshje në të gjitha garat, ku ka kontribuar me 115 gola dhe 88 asistime.

Kontrata e tij me Manchester City-n përfundon në verën e vitit 2023 dhe drejtuesit e klubit janë të vetëdijshëm se nëse nuk e shesin më herët, atëherë rrezikojnë ta humbin me parametra zero.

Vlera e Raheem Sterling, sipas “Transfermarkt” është 90 milionë euro.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.