BE na i hoqi vizat, pas 12 vjetësh

Në procesin më të gjatë krahasuar me secilin shtet, pas plotë 12 vjetësh procedura, Parlamenti Evropian ka miratuar vendimin për liberalizimin e vizave për qytetarët e Kosovës.

Ky votim ishte hapi përfundimtar i proceduarës që kulmon me 1 janar 2024, kur kosovarët do të mund të udhëtojnë në zonën Schengen pa viza.

“Nuk kam marrë asnjë propozim për të refuzuar qëndrimin e Këshillit të ministrave të BE-së dhe asnjë amendament. Prandaj, është miratuar qëndrimi i Këshillit dhe është miratuar akti i propozuar”, tha kryetarja e Parlamenti Evropian, Roberta Metsola.

Më 19 prill, pritet të nënshkruhet akti ligjor për liberalizimin e vizave, ndërsa hapi i vetëm që duhet të bëhet pas kësaj, është botimi i vendimit në Gazetën Zyrtare të BE-së dhe hyrja në fuqi e tij.

Megjithatë, Kosovës, për dallim nga shtetet e tjera të rajonit, i janë dashur 12 vjet nga lansimi i dialogut për liberalizimin e vizave deri në lëvizjen e lirë në zonën Schengen.

Procesi i liberalizimit të vizave për Kosovën nga ana e Parlamentit Evropian ka zgjatur më së gjati në historinë e procesit të liberalizimit të vizave, kjo pasi që shteteve të tjera të Ballkanit Perëndimor iu deshën 2 deri në 3 vjet.

Maqedonisë së Veriut, Malit të Zi dhe Serbisë iu deshën vetëm 2 vjet nga lansimi i dialogut për liberalizimin e vizave deri në lëvizjen e lirë të qytetarëve të tyre në zonën Schengen. Ndërsa Shqipërisë e Bosnje Hercegovinës 3 vjet.

Kosova fatin e njëjtë për sa i përket liberalizimit të vizave e ndan me Ukrainën, ndonëse Kievit zyrtar iu deshën vetëm 9 vjet proces dialogimi me BE-në deri në lëvizjen e lirë të ukrainasve në Union.

Këshilli i ministrave të BE-së e ka miratuar me shumicë të thjeshtë liberalizimin e vizave për Kosovën, muajin e kaluar.

Tashmë është e qartë se zbatimi i vendimit nuk do të shtyhet më larg se 1 janari i vitit 2024.

Kjo çështje ka qenë e lidhur me sistemin ETIAS të udhëtimit në Evropë, përkatësisht me hyrjen e tij në fuqi.

Meqë afati për funksionalizimin e ETIAS-it është shtyrë për në vitin 2024, heqja e vizave për qytetarët e Kosovës pritet të bëhet më 1 janar të vitit të ardhshëm.

Si janë rregullat e udhëtimit?

Rregullat do të lejojë kosovarët që të udhëtojnë pa viza në BE për një periudhë 90 ditore në çdo cikël 180 ditor.

Sipas qëndrimit të Këshillit, përjashtimi nga kërkesa për vizë do të zbatohet nga data e fillimit të funksionimit të Sistemit Evropian të Informacionit dhe Autorizimit të Udhëtimit (ETIAS) dhe në çdo rast jo më vonë se 1 janari 2024.

Në njoftimin e Këshillit për liberalizimin e vizave për Kosovën thuhet se Kosova ka bërë progres tejet të rëndësishëm në të gjitha stacionet e kushteve për liberalizmin e vizave përfshirë edhe fushat e sigurisë së dokumenteve, kufijve, migrimit, rendit publik, dhe të drejtat fondamentale lidhur me lirin e lëvizjes.

Në bazë të këtyre rezultateve, Komisioni kishte propozuar heqjen e vizave për kosovarët.

Kalimi edhe i Kosovës në udhëtime pa viza nënkupton që i gjithë Ballkani do të jetë në të njëjtin regjim vizash në raport me BE-në.

Derisa të vij 1 janari i 2024-së, Komisioni do të vazhdojë të monitorojë implementimin e kërkesave të BE-së.

Albanian Post kishte raportuar me 5 nëntor të vitit të kaluar ekskluzivisht se “Kosovës do t’i liberalizohen vizat shumë shpejt, pasi është arritur edhe pajtim mes Brukselit dhe Kosovës”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.