Mekanizmi i Mbrojtjes Civile të BE-së u aktivizua këtë javë për zjarret që digjen në të gjithë Evropën Juglindore.
Komisioneri për Menaxhimin e Krizave, Janez Lenarçiç, tha: “në luftën e vazhdueshme kundër zjarreve, Mekanizmi i Mbrojtjes Civile të BE-së u përgjigj menjëherë. Unë u jam mirënjohës vendeve anëtare që dërguan ndihmën – ky është solidariteti i BE-së në praktikë!”.
Pas një kërkese për ndihmë nga Maqedonia e Veriut, Gjermania dhe Suedia mobilizuan nga 2 avionë secili nga flota e rescEU.
Kjo ndihmë u plotësua nga Çekia me 1 helikopter rescEU dhe nga Sllovenia dhe Serbia me nga 1 helikopter. Përveç kësaj, një oficer ndërlidhës nga Qendra Koordinuese e Reagimit Emergjent të BE-së u vendos gjithashtu në Maqedoninë e Veriut për të ndihmuar në koordinimin e reagimit në vend.
Në Bullgari, në përgjigje të aktivizimit të Mekanizmit, Greqia dhe Franca vendosën nga 2 avionë secila. Për më tepër, 2 avionë nga flota e rescEU në Suedi plotësuan përgjigjen.
Së fundi, për të mbështetur Shqipërinë në luftën kundër zjarreve, u vendosën 2 avionë nga flota rescEU e stacionuar në Itali.
Qendra e Koordinimit të Reagimit Emergjent të BE-së vazhdon të monitorojë nga afër situatën, duke siguruar që ndihma e mëtejshme mund të shpërndahet me shpejtësi nëse kërkohet.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
