Aplikacione

BE: Ligj për firmat e teknologjisë në luftën kundër abuzimit të të miturve


Në muajt e ardhshëm, Bashkimi Evropian planifikon të nxjerrë ligje për t’u kërkuar kompanive të teknologjisë të bëjnë më shumë për të trajtuar abuzimin seksual ndaj të miturve.

Agjencia e lajmeve, “Reuters”, tregon se kjo do të arrihet duke u përforcuar marrëveshjet aktuale vullnetare.

Ylva Johansson, komisionerja e BE-së për Çështjet e Brendshme, ka thënë se ofruesit e shërbimeve të internetit dhe firmat e mediave sociale kishin raportuar 22 milionë shkelje në lidhje me abuzimin seksual të fëmijëve në vitin 2020.

Çka paraqet rrije nga viti 2019 ku ishin raportuar 17 milionë të tilla. Pa anashkaluar se, sipas saj, kjo është vetëm një pjesë e numrit real.

“Në muajt e ardhshëm do të propozoj legjislacionin që do t’u kërkojë kompanive të zbulojnë, raportojnë dhe heqin abuzimin seksual të fëmijëve”, ka treguar Johansson.

Ajo ka vijuar duke thënë se “kur të vijë momenti, një raport vullnetar nuk do të jetë më i mjaftueshëm”.

Sipas rregullave aktuale të BE-së, rrjetet e mediave sociale dhe shërbimet e postës dhe mesazheve si Facebook dhe Google kanë një zgjedhje nëse do të ndjekin apo jo shkeljet.

Referuar Johansson-it, lufta kundër abuzimit të të miturve duhet të koordinohet më mirë.

Dhe se nevojitet një qendër e specializuar evropiane për të përmirësuar parandalimin, zbatimin e ligjit dhe mbështetjen e viktimave.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com


Lajmet kryesore